அதிசய உறவுகள்

மீண்டு வருதலும்
மீண்டும் வருதலும்
ஒன்றுபோலத் தோன்றினும்
ஆழ நோக்கின்
இவைகள் இரண்டும்
வேறு பொருள் கொண்டவையே

உயிரோடிருத்தலும்
வாழுதலும் நமக்கு
ஒன்றுபோலப் படினும்
கொஞ்சம் சிந்தித்தால்
இவைகளிரண்டும்
எதிர் அர்த்தம் தருபவையே

ஒன்றை அறிதலும்
ஒன்றை உணர்தலும்
ஒன்று போலப் பொருள்தரினும்
சிறிது உற்று நோக்கின்
உறுதியாய் இவையிரண்டும்
இருவேறு துருவங்களே

கவிதையும் கவித்துவமும்
ஒரு பொருள் இரு சொல்லென
மயக்கம் தருகிற போதும்
கவனமாய் சீர்தூக்கிப் பார்க்கின்
இவைகளிரண்டும்
எப்போதேனும் ஒன்றுசேரும்
அல்லது  சேராதேத்  திரியும் 
அதிசய உறவுகளே