கொடுக்கிற இடமில்லை எடுத்துச் செல்லுமிடம்

நாங்கள் சன்னதியின் வாசலில் இருந்தோம்

 "இது முட்டாள்களின் சரணாலயம் "

எனச் சொல்லிப்போனார் 

ஒரு கருஞ்சட்டைக் காரர் 

"எல்லாம அவன் கொடுத்தது

அவனிடம் எப்படி கணக்குப் பார்ப்பது "

மொத்தமாக உண்டியலில்

பணத்தை கொட்டிக்கொண்டிருந்தார்

ஒரு தொந்தி பெருத்த" கன "வான்

"உனக்கு எப்ப மனம் வருகிறதோ

அப்போது செய்

நான் விடாது வந்துகொண்டுதான் இருப்பேன்

நீயா நானா பார்த்துவிடுவோம் "

தானாகபுலம்பிக் கொண்டிருந்தார்

ஒரு கூன் விழுந்தபெரியவர்

"இதில் எது சரி

எல்லாமே சரியாய் இருக்க வாய்ப்பில்லையே "

குழப்பத்தில் இருந்தான நண்பன்

"அவர்களை நம்பி "கை"யின்றி வருபவர்கள்

எதையும் எடுத்துச் செல்ல வழியில்லை

வெறுங் கையுடன் வருபவர்கள்

கையளவே  கொண்டு போகிறார்கள்

அண்டாவுடன் வருபவர்கள்

அள்ளிக் கொண்டு போகிறார்கள்.

இது கொடுக்கிற இடமில்லை

அவரவர் சக்திக்கு ஏற்றார்போல

எடுத்துக் கொண்டு செல்கிற இடம் " என்றேன்

நண்பன் கீழ் மேலாய்  தலையாட்டினான்

அது ஏற்றுக் கொண்டது போலவும் இருந்தது

ஏற்றுக் கொள்ளாதது போலவும் இருந்தது