மினிமலிஸம் என்பதை அதிகபட்ச எளிமை அல்லது சிக்கனத்தின் உச்சநிலை என்று சொல்லலாம். இருப்பதைக் கொண்டு வாழ்வது மற்றும் நாம் வாங்கும் ஒரு பொருளை 100% அல்லது அதற்கு மேலும் பயன்படுத்துவது. வாகனங்களை, மின்சாதனங்களை தேவைக்கு மட்டும் பயன்படுத்துதல். அதிகமான/ஆடம்பர பொருட்களை விலக்கி, குறைந்த/அத்தியாவசியப் பொருட்களுடன் அளவாக அழகாக வாழ்வது மினிமலிசம்.
அதிக பொருட்களுக்கு அதிக இடம்தேவை. அதனால் பெரிய வீடு, அவற்றின் பராமரிப்பு, மொத்தத்தில் கூடுதல் செலவு . பண விரயம்.
ஒரு திரைப்படத்தில் நாயகன் சொல்லுவார்,"இந்த ரீஃபிலை ஊதி ஊதி இன்னும் ரெண்டு challanஐ ஃபில் பண்ணிடுவேன்"னு. அதுவும் ஒரு மினிமலிச கோட்பாடு.
நாம் உபயோகித்து தூக்கி எறியும் ஒவ்வொரு பற்பசை குழாயினுள்ளே இருக்கும் பற்பசையினை வைத்து ஒருவர் ஒரு வாரம் பல் துலக்கலாம். நாம் அதனை முழுமையாக பயன்படுத்துவது இல்லை.
அதுபோல ஹேர்பின், கைக்குட்டைகள், பேனாக்கள்,பென்சில்கள் போன்ற பல பொருட்களை நாம் முழுதாக பயன்படுத்துவதில்லை.
நம் முன்னோர்கள் பல சம்பிரதாயங்களை வைத்திருந்தார்கள் அவையெல்லாம் உற்று நோக்கினால் அது ஒரு மினிமலிஸ்டிக் வாழ்க்கையை நோக்கித்தான் செல்லும். பிறந்த குழந்தைகளுக்கு தாய்மாமனின் வேட்டியில் தொட்டில் கட்டுவது அத்தை அல்லது பாட்டியின் புடவையில் மெத்தை தைத்துப் போடுவது என பல விஷயங்கள். Reuse methods. இப்போது ஒரு குழந்தை பிறந்தால் நாம் அதற்கு எல்லாமே புதிதாக வாங்க வேண்டும் என எண்ணுகிறோம். அவற்றை ஒரு வருடம் உபயோகித்து விட்டு ஓரம் கட்டி விடுகிறோம்.
கணவன் சாப்பிட்ட தட்டில் மனைவி உண்பதுகூட இதில் சேரும். எப்படியென்றால் உலகம் முழுவதும் இதை செய்தால்... (அந்நியன் ஃபார்முலா, அஞ்சு லட்சம் பேர் அஞ்சு பைசா திருடுனா)
எவ்வளவு தண்ணீர், எவ்வளவு சோப்பு மிச்சம்.. அடிக்க வராதீர்கள்..
சிறுவயதில் எனக்கு தெரிந்த ஒரு தாத்தா, தினமும் கிழிக்கும் நாள்காட்டியின் தாள்களை ஒரு கிளிப்பில் மாட்டி வைத்திருப்பார். கடைக்குச் செல்ல அதன் பின் புறத்தில் லிஸ்ட், கணக்குகளை எழுதுவார். கடைசியில் கோழி எச்சங்களை எடுக்கவும் அந்த தாள்களை பயன்படுத்துவார். அவர் எத்தனை மரங்களை காப்பாற்றியிருப்பார்.
இதுபோன்ற மினிமலிச வாழ்க்கையினால் என்னென்ன நன்மைகள் என்றால், சுற்றுப்புற சீர்கேடு குறையும். இயற்கை வளங்கள், புதுப்பிக்கத்தக்க வளங்கள் பாதுகாக்கப்படும். பண விரயம் குறைந்து மிச்சப்படும். சேமிப்பு அதிகரிக்கும். பொருளாதாரம் மேம்படும். கடன் தொல்லை இருக்காது. பிறர்க்கு உதவலாம். மன நிம்மதி கிடைக்கும்.
உடம்பைக் குறைக்க ஜிம்மில் சேர்ந்து பணம் கட்டி, ஒரு கிமீ தூரத்தில் இருக்கும் ஜிம்மிற்கு வண்டியில் சென்று சிறிது நேரம் நடப்பதற்கு, வீட்டிலிருந்து நடந்து சென்றால் எரிபொருள் செலவு மிச்சம். இரண்டு ரவுண்டாக நடந்தால், ஜிம் ஃபீஸும் மிச்சம்.
சிலசமயங்களில் நாம் நேரத்தை மிச்சம் பிடிக்க அதிக பணம் செலவு செய்கிறோம். ஆனால் மிச்சம் பிடித்த நேரத்தை என்ன செய்கிறோம்?
