Thursday, August 16, 2018

"தமிழனென்பேன் கன்னடியன் என்பேன்...

கையில் காசு குறைகிறதெனில்
வீட்டில்
சட்டிப் பானை உருட்டி
ஆர்ப்பாட்டம் செய்து...

காசு வ்ந்தவுடன்
அதனை
மதுக்கடையில் கொண்டு சேர்ப்பவனை
என்னவென்பாய் " என்றது
கருத்துப் பெருத்திருந்த
அந்தக் கார் மேகம்

"இதிலென்ன சந்தேகம்
குடிகாரன் என்பேன்
கூறு கெட்டவன் என்பேன்
இன்னும் சரியாகச் சொன்னால்
வாழத் தகுதியற்றவன் என்பேன்"
என்றேன்

இகழ்ச்சியாய் மின்னலாய்ச்
சிரித்த மேகம்...

"அது சரி
அப்படியானால்
குறைவாய்க் கொடுக்கையில்
அதன் அருமை புரிந்து
பகிர்ந்துவாழப் பழகாது
அரசியல் செய்பவனை

அதிகமாய்க் கொடுக்கையில்
சேமிக்கத்  தெரியாது
அதனை வீணாய்க்
கடலில் சேர்ப்பவனை
என்னவென்பாய் " என்றது நக்கலாய்..

சுருக்கென்றது

"தமிழனென்பேன்
கன்னடியன் என்பேன்
இன்னும் சரியாகச் சொன்னால்
இந்தியன் என்பேன் "
எனத் தான் சொல்லத் தோன்றியது

ஆனாலும்
இனப்பற்றும் நாட்டுப்பற்றும்
இடையிலிருந்துத் தடுக்க
மௌனமானேன்

மௌனத்தில் எரிச்சல் கொண்ட மேகம்
இடியெனச் சிரித்து
இன்னும் கருத்துக் கனக்கத் துவங்கியது

கோபத்தில் அது
இன்னமும் "கொட்டித்" தீர்க்கலாம்
எனப்படுகிறது எனக்கு

Tuesday, August 14, 2018

ஆயிரம் பதிவுகடந்தும்...

அறவுரையாய் அல்லாது
அறிவுரையாய் இல்லாது
அனுபவ உரையாய்...

அறிவுறுத்தியும் சொல்லாது
அலட்சியமாயும் சொல்லாது
எளிமையாய் மிக  இயல்பாய்..

கவிதையாயும் இல்லாது
உரையாயும் இல்லாது
இரண்டுக்கும் இடைப்பட்டதாய்..

இளக்கிய கவிதையாய்
இறுக்கிய உரையாய்
வசனகவிதை எனும் படியாய்

இழுத்தும் செல்லாது
ஒதுக்கியும் போகாது
உடன்வரும் வழிகாட்டியாய்..

பாண்டித்தியம் காட்டாதும்
"படி "இறங்கிச் சாயாதும்
தரமது நிலைக்கும்படியாய் ...

உயர்த்தும்படி இல்லையெனினும்
ஒதுக்கும்படி இல்லாது
தவறாது தொடரும்படியாய்

வேகமது குறைவெனினும்
விட்டுவிடாது தொடர்ச்சியாய்
எட்டாம் ஆண்டு எனும்படியாய்

ஆயிரம் பதிவுகடந்தும்
அயராது தொடர்கிறேன்
ஆரம்ப நாளைப்  போலவே

என்றும் குறையாது
தொடரும் உங்கள்
ஆதரவைப்  போலவே...

 வாழ்த்துக்களுடன்....


Monday, August 13, 2018

கன மனம் கொண்டோரே கவலை மிகக் கொண்டோரே

கன மனம் கொண்டோரே
கவலை மிகக் கொண்டோரே

நதிக்கரையோரம்...
குளக்கரையோரம்...
ஓடைக்கரையோரம்...

மெல்ல நடப்பதாலேயே
நீங்கள் ஆறுதல் கொள்வது நிஜம்தான்...

அந்தச் சூழல் உங்களுக்குள்
ஒருமாற்றம் ஏற்படுத்துவது நிஜம் தான்

ஆயினும்
அதற்கு மறுபக்கம் ஒன்று உண்டு
என்பதை நீங்கள் என்றேனும்  சிந்தித்ததுண்டா ?

ஆம் சிந்தித்தீர்கள் ஆயின்

நிச்சயம் கனத்த மனத்துடன்..
கவலை தோய்ந்த முகத்துடன்
அவ்விடம் செல்ல மாட்டீர்...

மேலே பறந்தபடி
தன்னைக் கவ்வ நோட்டமிடும்
பருந்துக் கூட்டம் எதையும்..

தவமுனிவனைப் போல்
ஒற்றைக்காலில் நின்று தன்னைக் கொத்த எண்ணும்
கொக்குக் கூட்டம் எதையும்...

வலைவீசியபடி
ஆசையோடுக் காத்திருக்கும்
மீனவர் கூட்டம் எதையும்...

துளியும் கவலையது கொள்ளாது

பிடிபடும் கடைசி நொடிவரை
சந்தோசித்துத் திரியும்
அந்த மீன் கூட்டதின் மன நிலையை..

அதன்
உற்சாக மன நிலையை
உல்லாச சுக நிலையை

உங்கள் கனத்த மன நிலை
கவலை கொண்ட மன நிலை

நிச்சயம் மாற்றவும்
வாய்ப்பு உண்டுதானே..

எனவே
கன மனம் கொண்டோரே
கவலை மிகக் கொண்டோரே...

Thursday, August 9, 2018

முகம் மறைத்துப் புரட்சித் தீமூட்டும்....

பிரச்சனையாளர்களாய் இருப்போம்
எப்போதுமே
பிரச்சனையாளர்களாய் இருப்போம்

பிரச்சனை சிறிது எனில்
ஊதி ஊதிப் பெரிதாக்குவோம்

பிரச்சனை ஏதும் இல்லையெனில்
நாமே அதை உண்டாக்குவோம்

ஏனெனில் பிரச்சனை இல்லையெனில்
நம்மை கண்டு கொள்வார் இல்லை

நம்மை அடையாளப்படுத்திக் கொள்ள
நியாய வழியில் வாய்ப்பே இல்லை

நேரடிச் சண்டையில்
சிறிதேனும் காயம் பட வாய்ப்புண்டு

நிழல் யுத்தத்தில்
சிறுகீறலுக்கும் நிச்சயம் வாய்ப்பில்லை

கவனமாய் முகம் தெரியாது
முகமூடி அணிந்து கொள்வோம்

பிறர் பொருளுக்கு ஆசைப்படும்
திருடனுக்கு மட்டுமல்ல

சமூக அமைதியைக் குலைக்கும் நமக்கும்
அது  நிச்சயம் அவசியம்

சொல்பவர்கள் ஆயிரம் சொல்லட்டும்

தானெரித்த  வீட்டில் சிகரெட்டுக்கு
நெருப்பெடுக்கும் சுகம்
அனுபவித்தால்தான் புரிந்து கொள்ள முடியும்

எரிபவர்கள் குறித்து வருந்துபவனுக்கு
இந்தச் சுகம் புரிய
நிச்சயமாய்  வாய்ப்பே இல்லை

முகம் மறைத்துப் புரட்சித் தீமூட்டும்
நவயுகப்  போராளிகளே...

வாருங்கள்

இன்றைக்கு எதைப் பற்ற வைப்பது
என்பது குறித்துச் சிந்திப்போம்

நாடு எப்படியோ நாசமாகட்டும்

நம்மை அடையாளப் படுத்திக் கொள்வதில்
நாம் நம்  கவனத்தைக் குவிப்போம்

Tuesday, August 7, 2018

"அந்தோ ஐயகோ "

"அந்தோ ஐயகோ "
சோகத்தின் உச்சத்திற்கான வார்த்தைகளாய்
உன் பயன்பட்டால்
வீரியம் கொண்ட  வார்த்தைகளை
உனக்கே பயன்படுத்தும்படி  ஆகிப் போனதே

ஐயகோ ! இந்தக் கொடுமையை
என்னவென்று சொல்வது ?

"அண்ணனுக்கு" நீ எழுதிய
இரங்கற்பாவே இன்று வரை
இரங்கற்பாவிற்கு இலக்கணமாய்..
இரங்கற்பா இலக்கியமாய்...

உனக்கே ஒரு இறங்கற்பாவா
இந்தக் கொடுமையை எப்படிச் சகிப்பது ?

அன்று இயக்கப் பாதையில்
நீ முதலடி எடுத்து வைக்கையில்
உன்னைச் சுற்றி
இரண்டு பட்டமேற்படிப்புத் தலைவர்களே அதிகம்

மிரண்டு விடவில்லை நீ
காரணம் உன்னிடம் அவர்களினும்
இரண்டு மடங்கு தமிழறிவும் தமிழுணர்வும்
தகிக்கித் கிடந்தது உன்னுள்

அன்றைய தலைவர்கள் எல்லாம்
நகர வாசிகளாய் நடுத்தரவாசிகளாய்
நீ மட்டும் கிராமவாசியாய் கீழ் நிலையாய்..

கலங்கிடவில்லை நீ...

காரணம் நீ  பேச்சாற்றலால்
தமிழகமெங்கும்
நகரும் வாசியாய் இருந்ததால்

பாமர மக்களை
இனிய தமிழால்
கவரும் வாசியாய் இருந்ததால்..

அண்ணனுக்கு அடுத்து நான்
என் முன் வரிசையில் எல்லோரும் இருக்க
நீ அண்ண்னுக்கு பின் பலமாய் இருந்தாய்

அதனால் தானே கழகத்தின் உயிராய்
தொண்டனுக்குத் தலைவானாய்
தமிழக முதல்வனாய் முன்மொழியப்பட்டாய்..

பதவியை முள் கிரீடமாய் எண்ணினாய்

அதனால்தான் உன்னால்

தென்றலின் சுகத்தில்
மயங்கா தீரனாய்

புயலில் கொடுமையில்
சோராத தலைவனாய்
இறுதிவரை இருக்க முடிந்தது

அதனால்தானே கழகத்தை
அண்ணன் போதித்த
கடமை கண்ணியம் கட்டுப் பாட்டுடன்
இன்று வரை கட்டிக் காக்க முடிந்தது..

நல்ல தெளிவுடன் இருக்கையிலேயே
" ஓயாது உழைத்த இதயம் இங்கு
ஓய்வு கொள்கிறது " என
கல்லறைக்கான  இறுதிவாசகம் தந்தவனே

சாணக்கியத் தனத்தினால்
உன் அரசியல் எதிரிகளையும்
உனக்குச் சாமரம் வீச  வைத்தவனே

பேச்சுச் திறத்தால்
உன் கொள்கை எதிரிகளையும்
உனக்குத் காவடித் தூக்க வைத்தவனே

திடமான முடிவுகளால்
என்றும் எதிரான வடவர்களையும்
உனக்கு கம்பளம் விரிக்க வைத்தவனே                                                                                      மக்கள் சேவையே மகேசன் சேவை என்பதில் நீ உறுதியாய் இருந்தாய்             அதனால்தானே அந்த மகேசனும்             பழுத்த ஆன்மீக வாதிக்கும் அருளும்   l ஏகாதசி மரணத்தை உனக்கு அருளி          மனம் நிறைவு கொண்டிருக்கிறான்

 உன் திறன் குறித்து எழுத
உன் புகழ்க் குறித்து எழுத
நிச்சயம் இங்கு எமக்குத் தகுதியில்லை

எங்கள் விழிப்புணர்வுக்காக
ஓயாது உழைத்த உதய சூரியனே

தமிழ் உள்ளவரை
உன் புகழ் நிச்சயம் உச்சத்தில்தான்

கையறு நிலையில்
கண்ணீர் மல்க விடைதருகிறோம்

போய் வா
தன் மானத் தலைவா

போய்வா
தமிழினதின் ஒப்பற்ற தலைவா

Monday, August 6, 2018

சாய்வு நாற்காலியில் இருந்து ...

இளமையில்
நல்லவைகள் எதைச் செய்யவும்
வரையரை வைக்காதீர்கள்

இளமையில்
நல்லவைகள்  எதை இரசிக்கவும்
எல்லைகள் வகுக்காதீர்கள்

ஏனெனில் முதுமையில் ...

நினைத்ததையெல்லாம்
முன்போல உங்களால்
சொல்லச் சாத்தியமில்லை

சொல்ல முடிந்தவைகள் மட்டுமே
நினைவுகளாய்...

விரும்பியதையெல்லாம்
முன்போல் உங்களால்
உண்ணச் சாத்தியமில்லை

உண்ணமுடிந்தவைகள்  மட்டுமே
விருப்பங்களாய்...

நண்பர்களையெல்லாம்
முன்போல் உங்களால்
சந்திக்கச் சாத்தியமில்லை

சந்திக்க முடிந்தவர்கள் மட்டுமே
நண்பர்களாய்...

இலட்சியங்களையெல்லாம்
முன்போல் உங்களால்
அடையச் சாத்தியமில்லை

அடைய முடிந்தவைகள் மட்டுமே
இலட்சியங்களாய்...

ஆம் ...

நினைத்ததையெல்லாம்
மிகச் சரியாய்ச் சொன்னதும்..

விரும்பியதையெல்லாம்
அதிகம் இரசித்து  உண்டதும்

நண்பர்களையெல்லாம்
தவறாது தினமும் சந்தித்ததும்

இலட்சியங்களையெல்லாம்
விடாதுத் தொடர்ந்து அடைந்ததுமே

முதிர்ந்த  நிலையில்
மனதுக்கு இதம் தருவதாய்..

தொடர்ந்து இயங்குவதற்கு
உடலுக்கு உரம் தருவதாய்...

வாழ்ந்த,
வாழும் வாழ்க்கைக்கு

முழுமையான அர்த்தம் தருவதாய்...
இருக்கச் சாத்தியம்  என்பதால் ..

இளமையில்
நல்லவைகள் எதைச் செய்யவும்
வரையரை வைக்காதீர்கள்

இளமையில்
நல்லவைகள்  எதை இரசிக்கவும்
எல்லைகள் வகுக்காதீர்கள்

Thursday, August 2, 2018

காதலும் கவிதையும்

"காதலர்கள் காதலில் தோற்று
தற்கொலை செய்துகொள்வது
தொடர்ந்து நடக்கிற போதும்...

கவிதைகள் என்கிற பெயரில்
குப்பை கூளங்கள்
தொடர்ந்துப் பெருகிடும் போதும்...

காதலும் கவிதையும் மட்டும்
எப்படி நித்தமும் புத்தம் புதிதாய்த்
தழைத்தபடியே இருக்கிறது

பதினாறு வயது மார்க்கண்டேயனாய்
எப்படி இளமைத் துடிப்புடன்
நிலைத்தபடியே இருக்கிறது " என்றான்
புதிதாய்க் காதல்வலையில் சிக்கிய நண்பன்

" எல்லாம்
அசட்டுத் துணிச்சலும்
குருட்டு நம்பிக்கையும்
 தரும் பலத்தால் தான் "என்றேன் சிரித்தபடி

"இது காதலை அறியாதவனின்
பொறாமைப் புலம்பல் " என்றான் எரிச்சலுடன்

"அரசியல் செய்யவில்லை என்றால்
அரசியல் தெரியாது என்று அர்த்தமில்லை
அப்படித்தான்
காதலிக்கவில்லை என்றால்
காதல் புரியாது என்றும் அர்த்தமில்லை" என்றேன்

"எனக்குத் தேவை
 புத்திசாலித்தனப் புலம்பல் இல்லை
ஏற்றுக் கொள்ளும்படியான
தெளிவான விளக்கம் " என்றான்

"பகைவனின் கோட்டைக்குள்
காதலி இருக்கிறாள் எனில்..

கிடைக்கும் நூலேணி பிடித்தோ
ஒட்டடை நூல் பிடித்தோ
ஏறும் அசட்டுச் துணிச்சலையும்...

ஒரு சந்தம் கிடைத்ததென்றால்
ஒரு சொல் கவர்ந்ததென்றால்...

அதைக் கொண்டே
ஒரு காவியம் இயற்றிவிடலாம் எனும்
குருட்டு நம்பிக்கையையும்

நிச்சயம்
காதல் உணர்வும்
கவிதை மனமும் மட்டுமே தரும்.

அதனால்தான்
காதலர்கள் தோற்றபோதும்
காதல் என்றும் தோற்காதும்..

குப்பைகள் நிறைந்தபோதும்
கவிதையும் வீரியம் குறையாதும்

தொடர்ந்து கொண்டிருக்கிறது "என்றேன்

இதனை ஒப்புக் கொண்டானா
எனத் தெரியவில்லை
ஆனால் பதில் கேள்வி எழுப்பவில்லை

Wednesday, July 25, 2018

சில இலக்கணங்கள்

அளவின்றி
சாவதற்காகக்  குடிக்காது
அளவறிந்து
சாகும்வரைக் குடிப்பவன்
குடிக்கத் தெரிந்தவன்

அளவின்றி
வயிறு நிறைக்க உண்ணாது
அளவறிந்து
உயிர்வளர்க்க உண்பவன்
உண்ணத் தெரிந்தவன்

இல்ல விஸ்தீரணம்
இருப்புப் பொருத்து அல்லாது
தேவைப்பொருத்து என அறிந்தவன்
நல்ல குடும்பஸ்தன்

ஆடை வடிவமைப்பு
தன் ஆசைப்படியல்லாது
உடல்   அமைப்புப்பின்படி எனத் தெளிந்தவன்
நல்ல இரசிகன்

மொத்தத்தில் ...

இருப்பதனால்
வாழ்ந்துகொண்டிருக்காது
வாழவதற்காக இருப்பவன்
வாழத்தெரிந்தவன்

எதையும்
எழுதுவதற்காகச் சிந்திக்காது
சிந்திப்பதனால் எழுதுபவன்                சிறந்த எழுத்தாளன்
என்பதைப் போலவும் ...

Tuesday, July 24, 2018

அடைகாத்தல்..

"விடுவி
இல்லையேல்
என்னைக் குறித்து
விசாரம் கொள்

காரணமின்றி
ஆயுள் கைதியினைப்போல்
அடைபட்டுக் கிடக்க
எனக்குச் சம்மதமில்லை "

பிதற்றிக் கொண்டே இருக்கிறது...

இன்னும் முழு வளர்ச்சிக் கொள்ளாத..

அடைபடுதலுக்கும்
அடைகாத்தலுக்குமான
வித்தியாசம் புரியாத...

விரும்பி என்னுள்
நான் இட்டுவைத்த உயிர்க்கரு.

கொக்கரித்துத் திரியும்
புறச் சேவல்களால்
மீண்டும் கருவுறாதபடியும்...

என் கவனச் சூடு
தவறியும் துளியும்
சிதறிவிடாதபடியும்...

நான் அன்றாடம் படும்பாடு..
நிச்சயம் கருவுக்குப் புரிய
சாத்தியமில்லாததால்...

அது பிதற்றிக் கொண்டே இருக்கிறது

 தாய்மைக்கே உரிய
அக்கறையுடனும் அவஸ்தையுடனும்
அதனை அடைகாத்துக் கொண்டிருக்கிறேன்...

இன்றும் எப்போதும்போலவே 

Monday, July 23, 2018

"மந்திரி "எனும் மாயச் சொல்லும்....

பற்பலப் பொருள் தரும் ஒரு சொல்
பலப்பலச் சொற்கள் தரும் ஒரு பொருள்

தமிழுக்கே ஆன சிறப்பு
அது தழிழனுக்குத் தந்தது பெரும் செறுக்கு

ஆனால் இன்று
முரண்பட்ட இரு சொற்கள் தரும்ஒரே பொருள்
இது தமிழுக்கே ஆன அழுக்கு

அது தமிழனுக்குத் தருதே பெரும் இழுக்கு

நம் விருப்பமின்றி நம்மை ஆண்ட
அன்னியனுக்கான
"ஆக்கிரமிப்பாளன் "எனும் சொல்லும்..

நம் வெறுப்புடனேயே கூட
நம்மை விடாது ஆளும்
"ஆட்சியாளன் "எனும் சொல்லும்...

அடிமை நாடு என்பதற்கு அடையாளமாய்
தவறாது அன்னியனுக்குச் செலுத்திய
"கப்பம் "என்னும் வரியும்

நமக்குப் பயன்படாது
சுய நலத்துக்குச் சுருட்டவே எனத் தெரிந்தும் செலுத்தும்
"வரி "என்னும் கப்பமும்

நமக்காக ஆள்வதாக சொல்லியபடி
தனக்காக ஆட்சி செய்பவனுக்கான
"சர்வாதிகாரி "எனும் சொல்லும்

நம் விருப்பப்படியே என முழங்கியபடி
தான் தன் குடும்பத்திற்கென ஆளுவோனுக்கான
"மந்திரி "எனும் மடச் சொல்லும்....

இப்படித் தொடரும் முரண்பட்ட சொற்கள்
ஒரு பொருள் தரும் இந்த அவலத்தை
என்று நம் செயலால் மாற்றப் போகிறோம்

முன்பு போலவே

பற்பல பொருள்தரும் ஒரு சொல் தரும் பெருமையும்
பற்பல சொற்கள்  தந்த ஒரு பொருள் அருமையும்
போதுமென நம் முயற்சியால் ஆக்கப்போகிறோம்

Tuesday, July 17, 2018

கொசுக்கள் உள்ளிருக்கும் கொசுவலை

கொசுக்கள் சூழ்ந்த இடத்தில்
குழந்தையைக் காக்க
கொசுவலைக்  கட்டுதல்
புத்திசாலித் தனமே

ஆயினும்
தெரிந்தோ தெரியாமலோ
கொசுக்களை
உள்ளே விட்டுக்கட்டுதல்
பெரும் மடத்தனமே

அடுக்கு மாடிக் குடியிருப்புகளில்
பாதுகாப்புக் கருதி
காவலர்களை நியமிப்பது
நிச்சயம் அவசியமே

ஆயினும்
வாய்ப்புக் கிடைத்தால் உடல் மேயும்
காமாந்திரர்களை நியமித்தல்
நிச்சயம் பெரும் ஆபத்தே

மக்கள் நலம் பேண
ஜனநாயக வழியில்
தலைவர்களைத் தேர்ந்தெடுக்கும் முறையே
ஆகச் சிறந்த முறையே

ஆயினும்
இலவசங்களுக்கு மயங்கி
பேராசைப் பேய்களைத் தேர்ந்தெடுத்து
அவதியுறும் நிலைபோலவே

Sunday, July 15, 2018

Useful message ...

If you know anyone in class 11 or 12, & interested in IIT preparation:
The IIT-Professor Assisted Learning (PAL) video lectures for Class XI and Class XII can be accessed on You Tube through the links shown below. Many faculty members from various IITs have contributed to these lectures. Prof. Ravi Soni from the Dept. of Physics, IIT Delhi is the national coordinator and IIT Delhi has coordinated this entire effort with funding from MHRD. Over 600 hours of lectures in Physics, Chemistry, Maths and Biology are available for students.
 Pl. pass on the information to your friends/relatives and their needy children.

Biology: Channel 19
www.youtube.com/channel/UCqiFTyCxFFMAN_lhAzIkdpA/videos
Chemistry: Channel 20
www.youtube.com/channel/UC3Zv0XxBjYlWMjbMv8ODE8Q/videos
Mathematics: Channel 21
www.youtube.com/channel/UCfz4W0rG8HoyyrrK6qNc1rA/videos belonging
Physics: Channel 22
www.youtube.com/channel/UCwNr8peMxn8-Nc2V_RZsRvg/videos

These videos can also be accessed on Doordarshan Freedish DTH. Complete list of videos is available at (Channel 19,20,21 and 22)

www.swayamprabha.gov.in/index.php/ch_allocation

 *Student no need to attend tuitions anymore.. forward to all students..save their money ..stop tuition mafia..*

Saturday, July 14, 2018

பயிற்சியும் முயற்சியும் வளர்ச்சியும்

 (விடா முயற்சியும் தொடர்ப்  பயிற்சியுமே
நீடித்த வளர்ச்சியுடன்நிலையாக
சிகரத்தில் நிற்க வைக்கும்

இந்தப் பாலப் பாடம் அறிந்தால் போதும்
மற்றவை எல்லாம்
தானாய் நிழலாய்த்  தொடரும்

இந்தச் சூட்சமம் அறிந்தோர் அனைவருக்கும்
மனமார்ந்த நல்வாழ்த்துக்களைத்
தெரிவித்துக் கொள்வதோடு

திறமையும் தகுதியும் இருப்பதால்  தானே
 தலைவர்கள் ஆனோம்

 பின் வீணாய் இன்னும் எதற்கு
இந்த அயற்சித் தரும்கூடுதல்  பயிற்சி
 என நினைப்போர் மட்டும்

 சிந்திக்க ஒரு சிறிய முயற்சி
ஒரு சிறு கவிதையாய்)

அந்த அழகிய ஏரியில்
உல்லாசப் படகில்
பலரும் பயணத்துக் கொண்டிருந்தார்கள்

அதில் நீச்சல் அறிந்தவர்களும் இருந்தார்கள்
 நீச்சல் அறியாதவர்களும் இருந்தார்கள்

 நீச்சல் அறிந்தவர்களின் கண்களும் மனமும்
ஏரியின் அழகில் அதன் குளுமையிலும்
மயங்கிக் களிக்க

அது அறியாதவர்களின்
 மனமும் நினைவும் ஏரியின் ஆழத்தையும்
இதற்கு முன் நடந்த விபத்தையும்
எண்ணியே  கலங்கிக் கொண்டிருந்தது

படகில் பயணம் செய்ய
நீச்சல் பயின்றிருக்க அவசியம் இல்லைதான்

ஆயினும் இரசித்துப் பயணிக்க
நீச்சல் அறிதல் நிச்சயம் அவசியம்

ஆம் எதையும்
வருந்திச் செய்யாது
விரும்பிச் செய்யவும்.
 விரும்பிச் செய்வதைத்
திருந்தச் செய்யவும்

பயிற்சி என்பது நிச்சயம் அவசியம்
.
 இன்றைய அரிமா மாவட்ட பயிற்சிமுகாமில்
கலந்து கொள்ளும் தலைவர் செயலாளர்
பொருளாளர் அனைவருக்கும் மனமார்ந்த 
வாழ்த்துக்களுடன்.

எஸ் வெங்கட சுப்பிரமணியன்
324B3 District  Area coordinator (Madurai )

Tuesday, July 10, 2018

உப்பும் தலைமையும்

இல்லையோ என
உணரும்படியாகக்
குறைவாகப் போடப்பட்ட உப்பும்

அதிகமோ என
உணரும்படியாக
அதிகமாகப் போடப்பட்ட உப்பும்

நிச்சயம்
உணவின் தரம் குறைத்துவிடும் என்பதும்

இருப்பது தெரியாதபடி
மிகச் சரியான அளவில்
இடப்பட்ட உப்பே
உணவின் சுவைக்  கூட்டும் என்பதுவும்

நல்ல சமையற்காரருக்குத் தெரியும்

பொறுப்பில்லையோ என
உணரும்படியாக
ஈடுபாடு இல்லாத தலைமையும்

ஆக்கிரமிக்கிறாரோ என
எரிச்சலூட்டும்படியான
அதிகாரம் காட்டும் தலைமையும்

நிச்சயம்
இயக்கத்தைப் பாழப்படுத்திவிடும் என்பதும்

தன்னைப் பிரதானப் படுத்தாது
அனவரையும் இயங்கவிட்டு
இணைந்து இயங்குவதே
இயக்கத்தை வலுப்படுத்தும் என்பதுவும்

நல்ல தலைவர்களுக்குத் தெரியும்

ஆம் பயிற்சிப் பெற்ற
அனைத்து அரிமாத் தலைவர்களுக்கும்
இது மிகத் தெளிவாய்த் தெரியும்

பயிற்சிப் பெற்றப் பின்
உங்களுக்கும் இது
மிகத் தெளிவாய்ப் புரியும்

( 15/07/2018 இல் நடைபெற உள்ள
 பயிற்சிப் பட்டறையில் கலந்து கொள்ள இருக்கிற
இவ்வாண்டின் தலைவர் செயலாளர் மற்றும்
பொருளாளர் அனைவருக்கும் மனமார்ந்த
நல்வாழ்த்துக்கள் )

அரிமா.எஸ். வெங்கடசுப்ரமணியன்
அரிமா மாவட்ட ஒருங்கிணைப்பாளர்
மதுரை

Wednesday, June 20, 2018

காலா ( 2 )

(http://yaathoramani.blogspot.com/2018/06/blog-post_13.html க்குத் தொடர்ச்சியாக )
 )

காலா வெளியாகி முதல் வார ஞாயிறு
என்பதால் கொஞ்சம் முன்னதாகவே போகலாம்
என நினைத்து அரை மணி நேரம் முன்னதாகவே
தியேட்டருக்குப் போனோம்

நான்கு தியேட்டர் உள்ள வளாகம் என்றாலும்
கூட்டம் அவ்வளவாக இல்லை. மிகக் குறிப்பாய்
நம்மவர்கள் மிகக் குறைவாக இருந்தார்கள்.
அதில் மிக லேசாகப் புன்னகைத்தவரை நெருங்கி
எப்போது அனுமதிப்பார்கள் எனக் கேட்டுச்
சினேகம் ஏற்படுத்திக் கொண்டேன்

"நீங்கள் ரஜினியின் தீவீர இரசிகரா " என்றார்
அவர்

"இல்லை அப்படியெல்லாம் இல்லை
ஏன் அப்படிக் கேட்கிறீர்கள் " என்றேன்

"இல்லை பொதுவாக இங்கு முதல் வாரத்தில்
அபிமான நடிகரின் தீவிர ரசிகர்கள் தவிர யாரும்
படம் பார்க்க வரமாட்டார்கள். காரணம்
முதல் வாரத்தில் டிக்கெட் விலை 20 டாலர்
மறுவாரம் என்றால் 7 டாலர் தான். அதுதான்
கேட்டேன் " என்றார்

"என்ன் இருபது டாலரா அப்படியானால்
வந்திருக்கமாட்டேனே.என் பெண் ஆன்லயனில்
டிக்கெட் எடுத்துக் கொடுத்துப் போய்ப் பார்த்து
வாருங்கள் என்றாள்.டிக்கெட் விவரமெல்லாம்
சொல்லவில்லை " என்றேன்

"சரிதான் சொன்னால் நிச்சயம் நீங்கள் வேண்டாம்
எனச் சொல்லிவிடுவீர்கள் எனச் சொல்லாமல்
இருந்திருக்கலாம். ஆன் லயன் டிக்கெட் என்றால்
நீங்கள் இங்கு நிற்க வேண்டாம். நேரடியாக
இந்த வழியாக உள்ளே செல்லலாம் " என
ஒரு வழியைக் காட்டினார்.

நான்கு தியேட்டர் உள்ள அந்த தியேட்டர்
வளாகத்தில் டிக்கெட்டைக் காண்பித்து
உள்ளே சென்று அமர்ந்தோம்,எமக்கு முன்பாக
ஒரே ஒரு குடும்பம் மட்டும் அமர்ந்திருந்தது

நாங்கள் எங்களுக்கு விருப்பமான இடத்தை
தேர்வு செய்து அமர்ந்தோம்
அப்போதுதான் புறப்படும் முன்பு என் பெண்
எப்போதும் சொல்லும் "அப்பா அமெரிக்கா வந்தால்
எப்பவும் நீ ஒரு பழக்கத்தை விடணும்.ஒன்னு
இந்தியாவுடன் எதெற்கெடுத்தாலும்
கம்பேர் பண்ணிப் பார்ப்பது மற்றொன்று
எந்தச் செலவையும்
ரூபாய்க்கு கன்வெர்ட் பண்ணிப் பார்ப்பது "
எனச் சொன்னது ஞாபகம் வந்தது

என்னால் கம்பேர் பண்ணிப் பார்க்காமல் எப்படி
இருக்கச் சாத்தியம்.எண்பது பைசா டிக்கெட்டே
அதிகம் என்று எழுபது பைசாவுக்கு முயன்ற நான்
ஒரு டிக்கெட் ஏறக்குறைய 1300/ ரூபாய் என்றால்..?

அனேகமாக என் வாழ் நாளில் அதிகப்
பணம் கொடுத்துப் பார்க்கிற படம் இதுதான்
நிச்சயம் கடைசியாக இருக்கும்
இனி எப்போது இங்கு சினிமா டிக்கெட் எடுத்து
போனாலும் விலை விசாரித்துதான் போக வேண்டும்
என முடிவெடுத்துக் கொண்டிருக்கையில்
தவிர்க்க இயலாமல் நான் முதன் முதலாகப் பார்த்த
சினிமாவின் ஞாபகம் நெஞ்சில் நிழலாடியது

மெல்லச் சிரித்துக் கொண்டேன்.விவரித்தால்
உங்களாலும் சிரிக்காமல் இருக்க முடியாது

( தொடரும் )

Wednesday, June 13, 2018

காலா







ஒவ்வொரு முறை இங்கு (யு.எஸ் )
வரும்போதும் அவசியம் பார்க்கவேண்டும் என
நான் எண்ணும் ஒரு திரைப்படம்  வெளியாகும் .
ஒருமுறை கபாலி ,ஒருமுறை
பாகுபலி 2 ,இப்போது  காலா

நான் சிறுவயதில் மதுரையை ஒட்டிய ஒரு
சிறிய கிராமத்தில்வளர்ந்தவன் .
அங்கு சினிமா என்றால்
எங்கள் ஊரில் டெண்ட்   கொட்டகையில்
வெளியாகும் சினிமாதான்

அதுவும் காலாண்டு   அரை அரையாண்டு
முழு ஆண்டுதேர்வு விடுமுறைக்கு
தலா ஒருபடம் வீதம் வருடத்திற்குமூன்று படம்
மற்றும் தீபாவளி பொங்கல் பண்டிகைக்கு
வெளியாகும் ஒரு சிறப்புத் திரைப்படம்.
அதுதான் வாய்க்கும்
(இந்தச் சிறப்புத் திரைப்படம் கூடுமானவரையில்
ஒரு புரட்சித்தலைவரின் படமாகத்தான் இருக்கும் )

இந்தப் படம் பார்க்கக் கூட அதிக மெனக்கெட
வேண்டியிருக்கும்விடுமுறை முடிந்து
பள்ளிக்கூடம் போனதும் லீவில்
என்ன படம் பார்த்தாய் என்பதுதான் உடன் படிக்கும்
மாணவர்களின் முதல் கேள்வியாயிருக்கும் .
பார்க்கவில்லை என்றால்அதுவே ஒரு தகுதிக்
 குறைவு போல் மதிக்கப்படும்

அதற்காகவே வீட்டில்   அழாத குறையாக அடம் பிடித்து
ஒரு திரைப்படம்  எப்படியும் பார்த்து விடுவோம்
வீட்டிலும் இதை சாக்காக வைத்து பல்ப் துடைப்பது
மாடி கூட்டுவது ,கொல்லைப்புற அறையைச் சுத்தம்
செய்ய வைப்பது முதலான பல வேலைகளை
வாங்கி விடுவார்கள்   என்பது வேறு விஷயம்

அப்படிப் பார்த்துப் போய்ப் கதை சொன்னால் கூட
நம்பாமல் கதை யாரிடமோ கதையை கேட்டு
கதை விடுகிறாய் என சொன்னதற்காக சினிமா
டிக்கெட்டைக் கூட பத்திரமாய் கொண்டு போய்
காண்பித்த நிகழ்வெல்லாம் இப்போதும் நினைவில்
இருக்கிறது

இப்படி சினிமா பார்த்துப் போய் பெருமையைப்
பீத்தலாம் எனப் போனால் வசதியான வீட்டுப்
பசங்க இரண்டொருவர் டவுனில் படம் பார்த்து விட்டு
அந்தப் பெருமையைப் பீத்த நாங்கள்
ஒன்று மத்தவர்களாய்கவனிக்கப்படாமல் அவர்கள்
பீத்தலுக்கு அடிமையாகிஅவர்கள் சொல்கிற
கதையைக் கேட்க வாய்ப்பிளந்துக்கிடப்போம்

அதிலும் சுப்பையான்னு ஒரு பையன் .ஒரு சினிமா
கதையைப் பகுதி பகுதியாய்  நான்கு ஐந்து நாள்
சுவாரஸ்யம் குறையாமல் சொல்வான்
முத்து  மண்டபம்  என்று ஒரு சஸ்பென்ஸ் படம்
அதில் கொலைகாரன் யாரென்று சொல்லாமல்
எங்களை ஐந்து நாள் திண்டாடவிட்டு பின் ஒரு நாள்
இரக்கப்பட்டு முடிவைச் சொன்னான் .அதுவும்
அவன் புத்தகத்திற்கு அட்டைப்போட்டுக் கொடுத்த பின்பு

இப்படி வளர்ந்த சூழ் நிலையில் பின் உயர் நிலைப்
பள்ளி வந்ததும்   டவுனில் சினிமா பார்ப்பதற்காக
காசு சேர்த்த கதை ,காலைப்  பத்து மணி
காட்சிக்குப் போய்தொடர்ந்து இரண்டு காட்சிக்கு
 டிக்கெட் கிடைக்காது போயும் மனம் தளராது
நள்ளிரவுக்கு காட்சிப் பார்த்து
ஊருக்கு நடந்தே திரும்பிய கதை ,பெண்கள் மற்றும்
சிறுவர்களுக்கென இருந்த 70 பைசா டிக்கெட்
எடுப்பதற்காக  (பெரியவர்களுக்கு 80 பைசா )  முட்டி
மடித்து குள்ளமாய் நடந்த கதை ,என எம் வாழ்வோடு
பின்னிப்பிணைந்த சினிமா தொடர்பான
நினைவுகள் எல்லாம் இந்தக் காலா படம் பார்க்க
அந்தத் திரைப்படத் தியேட்டர் வாயிலில் காரை விட்டு
இறங்கியதும்  தொடர்ச்சியாய் வந்து போனது
அதற்கு காரணம் இல்லாமல் இல்லை

                                                                  ( தொடரும்   )

   

Monday, June 4, 2018

மூல மந்திரம்

உயிரின் அருமை
அறிந்து தெளிந்தோம்
அதன் காரணமாய்
உடல் மீது கவனம் கொண்டோம்

உடல் மீது
கவனம்  கொண்டோம்
அதன் பொருட்டு
உட்கொள்பவைகளின் மீது
அக்கறை   கொண்டோம்

உட்கொள்பவைகளின் மீது
அக்கறை   கொண்டோம்
அதன் தொடர்ச்சியாய் 
நிலம், நீர்,வெளி இவைகளின்
அருமை அறிந்தோம்

நிலம், நீர் ,வெளியதன்
அருமை அறிந்தோம்
அதன் நீட்சியாய்
அதன் தூய்மையைக்  காத்தலே
முதல் நெறி என உணர்ந்தோம்

'எதிரிலிருக்கும்  கோன் உயர
வெளியே விரவிக்கிடக்கும்
வரப்புயர்தல்  அவசியம் "என்ற
அவ்வையின் அறிவுரை
அறிந்த நமக்கு

 "உடல் வளர்த்தேன்
உயிர் வளர்த்தேனே  " என்று
விரிந்த ஒன்றை சுருங்கச் சொன்ன 
திரு மூலரின்  வாக்கினைப்
புரிந்த நமக்கு

"சுற்றுப்புறச் சூழல் காத்தலே
நம் உடல் காக்கும்
நம் உடல் மூலம் நம் உயிர்  காக்கும்
மூல மந்திரம்  "என்பதனை
பிறர் விளக்கவேண்டுமா என்ன ?

Friday, June 1, 2018

குழந்தைகள் தின நல்வாழ்த்துக்கள்

அதிகாலைச் சூரியனோடு
கைகோர்த்து நடை பயிலுங்கள்
அது உடலினை உறுதி செய்யும்

மாலை நேரத் தென்றலோடு
மனம் திறந்து பேசுங்கள்
அது மனப்பளுவைக் கனவாக்கிப் போகும்

முழு நிலவின் ஒளியோடு
கரையக் கற்றுக் கொள்ளுங்கள்
அது பல உன்னதங்களை அறிமுகம் செய்து போகும்

பூத்துச் சிரிக்கும் மண  மலரோடு
சினேகம் செய்து கொள்ளுங்கள்
அது வாழ்வின் அர்த்தத்தை தெளிவாக்கிப் போகும்

நீலக் கடலின்  பிரமாண்டத்தில்
இலயிக்கக் கற்றுக் கொள்ளுங்கள்
அது  பேரறிவாளனை உணரச் செய்து போகும்

காட்டோடும் மலையோடும்
தனித்திருக்கப் பழகுங்கள்
அது   அமைதியின்  அருமை  உணர்த்திப் போகும்

 இவை எதற்கும் நேரமில்லையெனில்
குழந்தைகளோடு  இணைந்திருக்க  முயலுங்கள்
நிச்சயம்  அது
இவை அனைத்தையும்  ஒன்றாகச் சேர்த்துத் தரும்

Wednesday, May 30, 2018

பிரசவ சங்கல்பம்

தன்னைப் பாதிக்கிற
ஒவவொரு நிகழ்வும்
ஒவவொரு உணர்வும்
கருவாகி
அவனுள் வளர்ந்து
கவியாக வரும் வரை
கவிஞன் படும் பிரவச அவஸ்தை
அவன் மட்டுமே அறிந்தது

ஆயினும்
கருவானது கவியாகி
கால் கொண்டு நடக்கையில்
அது தரும் அவஸ்தை
அது கூட அவன் மட்டுமே அறிந்தது

இளைஞர்களை கொள்ளை கொண்ட
'இழந்த காதலை'
இயற்றிய அவனே
மறந்து போன நிலையில்...

கவிஞனின் மனைவி ஒரு நாள் கேட்டாள்
'யார் அந்த அழகு சுந்தரி
இப்பொது கூட விலகி கொள்கிறேன்
இடைஞ்சலாக இருக்க மாட்டேன்' என
கண் கசக்கிப் போனாள்
இந்தப் பிரச்சனை ஒயவே
ஆறு மாதங்கள் ஆகிப்போனது

'நண்பனின் நயவஞ்சகம்'
கவிதை வெளிவந்த பின்னே
கவிஞனின் நெருங்கிய நண்பன்
தொடர்பு எல்லையை விட்டு
தொலைந்தே போனான்

அதற்கான காரணம்
இதுவரை
கவிஞனுக்கு விளங்கவே இல்லை

'சம்பந்திகளின் தர்பார்'
கவிதைக்கு பின்னே
மாப்பிள்ளை முகம் கொடுதது பேசுவதே இல்லை

'தவறினை நேரடியாகச் சொல்லியிருக்கலாம்
கவிதையாக்கி
அசிங்கப் படுத்தியிருக்க வெண்டாம்' என
சொல்லி போன சம்பந்தி
கவிஞனின் வீட்டுப் பக்கம்
இன்று வரை வரவே இல்லை

முத்தைக் கொண்டு
கடற் பரப்பைக் கூட
அளந்து அறியக் கூடும்
படைப்பைக் கொண்டு
படைப்பாளியை அறியக் கூடுமோ?

கவிதைக்குள் கவிஞனைத் தேடினால்
கவிதைகள் நீர்த்துப் போகும்

கவிஞனுக்குள் கவிதையைத் தேடினால்
'தங்க முட்டை வாத்தே' மிஞ்சும்

ஆனாலும் என்ன.....
கவிஞனை பாதிக்கும்
நிகழ்வுகளும் உணர்வுகளும்
தொடர்ந்து கொண்டுதான் இருக்கின்றன
கவிதைகள் பிறந்து கொண்டுதான் இருக்கின்றன

Saturday, May 26, 2018

கால எல்லைகளை கடக்கத் தெரிந்தால்...

கால எல்லைகளை
கடக்கத் தெரிந்தால்
இணக்கமாய் மனத்துள்
நினைக்க முடிந்தால்
புரியாத புதிர்கள்
புரிந்து போகுமோ ?
குழப்பிய நிகழ்வுகள்
சீராகிப் போகுமோ ?

கவிஞராக இல்லாது
வணிகராக இருந்தவர்
ஒருசிறு அதிர்வினில்
பெருங்கவிஞர் ஆவது
எங்ஙனம் சாத்தியம் ?

முத்தான கவிதை
என்பது கூட
நிச்சயமாய் சாத்தியம்
"முத்தைத்தரு பத்தித் திரு நகை.."
எங்ஙனம் சாத்தியம்  ?

முருகனடியாரின்
கதைகேட்டு நானும்
குழம்பித் தவித்ததுண்டு
நம்பாது கதையென்று
நாளும் நினைத்ததுண்டு

ஒரு நாள்..
கைபேசி மாற்றாது
"சிம்"மதனை மட்டுமே
சில நேரம் மாற்றிவிட
அலைபேசியின் உள்ளடக்கம்
அடியோடு மாறிவிட
புதிருக்குத் தெரிந்தது புதிய வழி
எனக்குள் புகுந்தது புதிய ஒளி

உடல் உருவம் மாற்றாது
அங்ஙனமே இருக்கவிட்டு
அறிவுதனை மட்டுமே
அடியோடு மாற்றுகிற
அதிசயங்கள் ஏதேனும்
நடந்திருக்கச் சாத்தியமா ?
பட்டினத்தாரும் அதுபோல
மாறியிருக்கச் சாத்தியமா ?

Friday, May 25, 2018

அமைதியில் நிலைப்போம்..

மன அமைதியை இரசிப்போம்
மன அமைதியில் இலயிப்போம்
மன அமைதியில் நிலைப்போம்

மன அமைதியே பேரானந்தத்தின்  ஊற்று
மன அமைதியே கலைகளுக்கு ஆசான்
மன அமைதியே சக்திக்கு ஆதார மையம்

பரந்து விரிந்த புல்வெளி
பனிபடந்த மலைச் சிகரம்
சலசலத்து ஓடும் சிற்றோடை
ஆரவாரமற்ற தெய்வ சன்னதி
மழலையின் மயக்கும் சிரிப்பு ...

இன்ன பிற  எல்லாம்
அமைதியின்
உற்பத்திச் சாலைகள் இல்லை

அமைதியின்
 சுகம்காட்டும்
அற்புத ஆதாரமையங்கள்

ஆதாரமையங்கள்  வழி
நம் மன இரசிப்பைத் துவங்குவோம்

மனம் அமைதியை இரசித்தல்
 வெறும் துவக்கமேஎன அறிந்தபடி...

மனம் அமைதியில் இலயித்தல்
ஒரு  தொடர்ச்சியேஎன உணர்ந்தபடி..

மனம் அமைதியில் நிலைத்தேலே
 முதிர்ச்சி எனத்  தெளிந்தபடி ....

Thursday, May 24, 2018

ஆலையில்லா ஊரில்...

அவசரத்தில் போகிறப்  போக்கில்
எதிர்ப்படும் நண்பனை
விசாரித்துப்போகும்
 "மினிச் சுகத்தை "
"டுவீட்டுகளிலும்

அவசியமாகத்  தவிர்க்க முடியாதுக்
காத்திருக்கும் தருணங்களில்
சந்தித்த நண்பனுடன்
உரையாடும்
 "தனிச் சுகத்தை "
"முக நூலிலும் "

விடுமுறை நாட்களில்
ஊர்க்கோடிப்  பாலத்தில் அமர்ந்து
சாவகாசமாகப் பேசும்
 "அற்புதச் சுகத்தை"
"பதிவுப் பக்கங்களிலும் "

அனுபவித்தபடி என்னை நான்
ஆசுவாசப்படுத்திக் கொள்கிறேன்

என்ன செய்வது
கடமைச் சுமை அழுத்தக்
கூன் விழுந்த மனத்துடன்
கட்டிடக்  காட்டுக்குள்
அன்றாடம் அலைந்து திரிந்துத்   ...
தன்  சுயம் தொலைப்பவன் ...

முழு நிலவின் அழகையும்
மனதைக் குளிர்விக்கும்
அந்தப் பனிப் பொழிவையும்

குளிரூட்டப்பட்ட திரையரங்குகளில்
மெய் நிகர்க்  காட்சிகளைக் கண்டு  தானே
" மெய்மறக்க  " முடியும் 

Wednesday, May 23, 2018

நம் இணைய தளத்தின் பெருமையை....

எந்த ஒரு கட்சியின்  தலைவனாயினும்
எந்த ஒரு இயக்கத்தின் தலைவனாயினும்
தான் முன்னெடுத்துச் செல்லும்  போராட்டத்திற்கு
முன்  நிற்கவும்  வேண்டும்

 வெற்றியோ தோல்வியோ அதன் முழு
நிகழ்வுகளுக்கும் பொறுப்பு ஏற்கவும்  வேண்டும்

மாறாக கொள்ளு  என்றால் வாயை த் திறந்து
கடிவாளம் என்றால்  வாயை மூடும்
கெட்டிக்கார குதிரை போல

வெற்றி என்றால் தோளை நிமிர்த்துவதும்
தோல்வி என்றால் ஓடி ஒளிவதும் நிச்சயம்
நல்ல தலைவனுக்கு   அழகில்லை

அதிலும் குறிப்பாக தங்கள் உணர்ச்சிகரமான
பேச்சில்  மயங்கி  தன்  சுக துக்கங்களை  மறந்து
களத்தில் நின்று பேராடுபவர்கள் பாதிக்கப்படுகையில்
நிச்சயம் கூடுதல் பொறுப்பெடுக்கவே வேண்டும்

அரசும் மக்களின் அதிருப்தி தலைகாட்டும் போதே
அதுதொடர்பாக கவனம் கொள்ளாது அலட்சிய
மனோபாவம் கொள்வதும் ,பிரச்சனைகள் குறித்து
கவனம் செலுத்தாது  அதைத் தலைமை தாங்கித்
தொடர் பவர்களை வேறு வேறு  வண்ணங்கள் பூசி
கொச்சைப்படுத்த முயல்வது நிச்சயம்  உச்சக்கட்ட
அநாகரிகம்

இதில் மூன்றாவதாக இணைய தள போராளிகள்
தொலைக்காட்சி விவாத விற்பன்னர்கள் வேறு

எரிகிற கொள்ளியில் எங்கோ
 சுகமாய் இருந்து  கொண்டு எண்ணெய் வார்த்தபடி ..

தம் எழுத்தும் பேச்சும் பிரச்சனைகளை இன்னும்
அதிகரிக்கச் செய்யுமே தவிர
நிச்சயம் குறைக்கப்போவதில்லை
எனத்  தெளிவாகத் தெரிந்தும்  விதம் விதமாய்
எழுதியபடி பேசியபடி ... பகிர்ந்தபடி

முன்பும் எப்போதும் பிரச்சனைகளும்  போராட்டங்களும்
அரசின் அலட்சியப்போக்கும் இல்லாமல் இல்லை
இருந்தது

பற்றிய நெருப்பை அணையவிடாதும்  தொடர்ந்து
பரவ விடும் காற்றினைப்போல ஊடகங்கள்
இப்போதைப்  போல அப்போது இல்லை

எந்த ஒரு பிரச்சனைக்கும் தன்னுடைய கருத்தை
உலகமே எதிர்பார்த்திருக்கிற அதீத மனோ நிலையில்
அன்றைய தனி மனிதர்களும் இல்லை

முன்னிருவர் திரும்ப முடியாத அளவு  வெகு தூரம்
மோசமான நிலைக்கு வந்து விட்டனர்
அதன் விளைவுகளை அவர்கள் நிச்சயம் அறுவடை
செய்வர் .பட்டுத் திருந்தட்டும் அவர்கள்

அதைப்  போல்  தொலைக்காட்சி மற்றும்
செய்தித் தாள்களின் மீதான நமபகத் தன்மையும்
படிப்படியாய்க் குறைய ...

நம் இணையத்  தொடர்பில் வெளியாகும்
செய்திகளைத்தான் நம்பத்  தக்கதாக
மக்கள் கொள்ளும்படியான சூழல்  இன்று உள்ளது

எனவே பலம் கூடக்  கூட  பொறுப்புகளும்
கூடவேண்டும் இல்லையேல் பலம் கூடிப்
பயனில்லை என உணர்ந்து...

உணர்வுப் பூர்வமான விஷயங்களில்  மேலும் உணர்வைத்   தூண்டும்படியான பகிர்வுகளைத்
தவிர்த்து

,அறிவுப்பூர்வமான அவசியமான பதிவுகளை  மட்டும்
பதிவோம், பகிர்வோம்  என உறுதி பூணுவோமாக

நம் இணைய தளத்தின்   பெருமையை அருமையை
இன்னும் உயர்த்த உறுதி கொள்வோமாக 


Tuesday, May 22, 2018

தேடல்

என் முன்னே என் பின்னே    
லட்சம் லட்சமாய்
கோடி கோடியாய்
எல்லோரும் ஒடிக் கொண்டிருக்கிறார்கள்
என்னைப் போலவே

"நாமெல்லாம் எங்கே போகிறோம்" என்றேன்
என்னை ஒத்தவரிடம்

"நம் முன்னால் செல்பவர்கள் எல்லாம்
தெளிவானவர்கள்
அனைத்தும் தெரிந்தவர்கள்
அவர்கள் பாதையில்தான் நாம் போகிறோம்" என்றார்

"நம் பின்னால் வருபவர் கூட நம்மைப் பற்றி
அப்படி எண்ணலாம் தானே
அப்படியானால் அது தவறல்லவா" என்றேன்
அவர் முறைத்த படி ஓடத் துவங்கினார்

"நம் பயணத்தின் முடிவில் என்ன இருக்கும்" என்றேன்
பக்கத்தில் ஒருவரிடம்

"தக தகக்கும் தங்க வாயில் கொண்ட சொர்க்கம் இருக்கும்
நம்மை வரவேற்க்க ஆண்டவன் அங்கே இருப்பார்" என்றார்

"இதனைப் பார்த்துத் திரும்பியவர் எவரேனும் உண்டா
இல்லை உறுதி செய்யத்தான் யாரேனும் உண்டா" என்றேன்


நீ நாத்திகம் பேசுகிறாய்
நீ எதனயும் அடையவும் மாட்டாய்
நீ எவனையும் அடைய விடவும் மாட்டாய்" என சபித்துப் போனான்

நான் சலிப்பின்றி அடுத்தவரிடம் கேட்டேன்
"நாம் எதற்காக ஓடுகிறோம்"
அவன் சொன்னான்

"நம் கால்கள் ஓடத்தான் படைக்கப் பட்டிருக்கின்றன
நாம் ஓடத்தான் பயிற்றுவிக்கப் பட்டிருக்கிறோம்
என்வேதான் ஓடுகிறோம்"

நான் சொன்னேன்
"நிற்கவும் நடக்கவும்
ஓய்வாக அமரவும்
நாம் பயிற்றுவிக்கப் பட்டிருந்தால்
நம் கால்கள் அதற்காகத்தான் படைக்கப்பட்டது
எனக் கொள்ளலாமா?

"நீ பேசுவது விதண்ட வாதம்
இதற்கான பதிலை நிற்பவனிடமோ அல்லது
ஓய்வாக அமர்ந்திருபவனிடம் கூட கேட்கலாம்தானே"
என்றான் வெறுப்புடன்

ஓடுதலை விடுத்து
ஓரமாய் ஒதுங்கி
ஓய்வாக அமர்ந்திருப்பவரைப் பார்த்துக் கேட்டேன்

"இவர்கள் எல்லாம் ஏன் ஓடுகிறார்கள்
நீங்கள் எல்லாம் ஏன் ஓய்வாக இருக்கிறீர்கள்"

அவர் சிரித்தபடி கேட்டார்
"கேள்வி உன்னுடயதா
அல்லது உன்னிடம் கேட்கப்பட்டதா" என்றார்

"கேள்வி என்னுடையதுதான்" என்றேன் அடக்கமாய்

"அப்படியானால் சரி
அறிந்ததையெல்லாம் ஆழப் புதை
கண்களையும் காதுகளையும் கவனமாய் மூடு
உள்ளே மிக உள்ளே தொடர்ந்து போ
உற்றுப் பார்-கேள்வி கேள் -
உனக்கே எல்லாம் தெரியும்" என்றார்

"நீங்களெல்லாம் விடைத் தெரிந்தவர்களா" என்றேன்

அவர் பலமாகச் சிரித்துச் சொன்னார்
"சும்மா இருப்பவர்களிடம் மட்டும் இல்லை
ஓடுகிறவர்களில் கூட விடை தெரிந்தவர்கள் இருக்கக்கூடும்

ஆனாலும் என்ன
பெரும்பாலோர் விடைத் தேடி அலைபவர்கள்

இன்னும் பெரும்பாலோர்
விடை தெரிந்தவர்கள் போல் நடிப்பவர்கள்" என்றார்

நான்
தொடர்ந்து ஓடவும் இல்லை
ஓய்ந்து அமரவும் இல்லை
நின்றபடியே இருக்கிறேன்

எல்லாம் புரிந்தது போலவும் இருக்கிறது
எதுவுமே புரியாதது போலவும் இருக்கிற்து
முன்னைப் போலவே....

Monday, May 21, 2018

நாளைப் பிடித்தல்

 லாகவமாய்ப்  பிடிக்கும்
 சூட்சுமம் அறிந்தவர்களிடம்
 பயிற்சிப் பெற்று                                   
முதல் நாள் இரவில்               
ஒத்திகையும் பார்த்து                           
மிகக் கவனமாய் ...                   
கண்கொத்திப் பாம்பாய் 
விடியலுக்காகக் காத்திருக்க.       

 சோம்பல் இடுக்கில்                 
சுவாரஸ்யப் புதர்களில்
அதன்  தன்மை மாறாது              
 மெல்ல மெல்ல நழுவி                     
மறைந்துத் தொலைகிறது
விடிந்த இந்த நாளும்         
எப்போதும் போலவே

சற்றும் மனம் தளரா
விக்கிரமாதித்தனாய்
இன்று இரவும்
ஒத்திகையைத் தொடர்கிறேன்

 நாளையேனும்
முழுப்பொழுதையும்
என் பிடிக்குள் அடக்கவேண்டும் எனும்
அசைக்கமுடியா உறுதியுடன்
எல்லோரையும் போலவே

Sunday, May 20, 2018

சுற்றுச் சுவர்

கரிய இருள்
கூடுதல் தூரம்
அறியாமை
வெறுப்பு மட்டுமல்ல

கூடுதல் வெளிச்சம்
அதிக நெருக்கம்
பரிபூரணமாய் அறிதல்
அதீத அன்பு கூட

புரிதலையும்
அன்னியோன்யத்தையும்
மிக எளிதாய்
அடியோடழித்துப் போகிறது

இப்போதெல்லாம்
போதுமான ஒளி
கண்ணுக்கெட்டியதூரம்
தேவையான அறிதல்
கைகுலுக்கும் நெருக்கத்தோடு
என்னை நிலை நிறுத்திக்கொள்கிறேன்

வெகு நாட்களாய் 
பட்டுப்போய்க் கிடந்தவைகள்   கூட
இப்போது  லேசாய்
மிக லேசாய்த்   துளிர்க்கத் துவங்குகின்றன

Saturday, May 19, 2018

காலம் கடக்க நினைப்பதுதான்....

எதைப் பறக்க வைப்பது
எதை  இறக்கி வைப்பது
காற்றுக்கு அது தெரியும்
பறக்க நினைப்பதுதான்
காற்றைப் புரிந்து  கொள்ளவேண்டும்

 எதனைமுளைக்கச் செய்வது
 எதனை மக்கச் செய்வது
மண்ணுக்கு அது தெரியும்
முளைக்க முயல்வதுதான்
தன்னுள் உயிர் கொள்ள வேண்டும்

எதனை   மிதக்கச் செய்வது
எதனை  மூழ்கச் செய்வது
நீருக்கு அது தெரியும்
மிதக்க நினைப்பதுதான்
தன்னை தகவமைத்துக் கொள்ளவேண்டும்

எதனை அணைத்து எரிப்பது
எதனை எரிக்காதுக்  கடப்பது
நெருப்புக்கு அது தெரியும்
நிலைக்க நினைப்பதுதான்
தன்னை திடப்படுத்திக் கொள்ளவேண்டும்

எதனைக் கடத்தி  ரசிப்பது
எதனை அழித்துச் சிரிப்பது
காலத்திற்கு அதுதெரியும்
காலம் கடக்க நினைப்பதுதான்
தன்னைத்  தகுதிப்படுத்திக்  கொள்ளவேண்டும்

Thursday, May 17, 2018

புலிவேஷம்

மனித மனங்களில் எல்லாம்
புதர் மண்டி
காடாகிப் போனதால்
ரொட்டிக்கான தொடர் போருக்கு
நிஜ உருவை விட
புலிவேசமே பொருத்தமாய் இருக்கிறது

பொறுக்கப் போகிற
பாவனை மறைத்து
வேட்டைக்குச் செல்வதுபோல்
முகமெங்கும் புலிவரிகளை
பூசிக் கொண்டேன் ஆயினும்
நிஜப் புலிகளின் நெருக்கத்தில்
மருங்கிய பார்வையை ஏனோ
மறைக்க முடிவதேயில்லை

பாவப்பட்ட  முட்டாள் ஜந்துக்கள்
புலியெனஏமாந்து ஒதுங்குவதில்
கிடைக்கும் சில சௌகரியங்களும்
தொலையும் சில அசௌகரியங்களும்
ஒப்பனையின் அவசியத்தை
உறுதிப்படுத்திப்போனாலும் கூட

ஒவ்வொரு முறை ஒப்பனையிடும்போதும்
நோவையும் நோயையும்  மறைக்கவென
விலைமகள் போடும்
மாலைவேளை ஒப்பனையை
ஒப்பிட்டு வேதனையுறும்  மனம் மட்டும் ஏனோ
அடுப்படிப் பூனையாய் ஒடுங்கிப்  போகிறது

ஆனாலும் என்ன
ரொட்டிக்கான போருக்கு
புலிவேசமே பொருத்தமாய் இருக்கிறது

Tuesday, May 15, 2018

பாவப்பட்ட அவன்

உட்புறம் தாளிட்டுக்
கதவருகில் அமர்ந்தபடி
யாரேனும் வரமாட்டார்களாவென
வெகு நேரம் காத்திருந்து
மனச் சோர்வு கொள்கிறான்

தானே இழுத்து அடைத்த
ஜன்னலருகில் அமர்ந்தபடி
அறையினைக் கொதிகலனாக்கும்
வெக்கையில் புழுக்கத்தில் தன்மீதே
கழிவிரக்கம் கொள்கிறான்

தனிமைத் துயர்
குரல்வளை நெறிக்க
யாரேனும் அழைக்கமாட்டார்களாவென
தொலைபேசிக்கு அருகமர்ந்து
மனம் சலித்துப் போகிறான்

யாராவது சிரித்தால்
சிரிக்கலாமென்று ஆவலோடும்
யாராவது பேசினால்
பேசலாமென்று ஆர்வத்தோடும்
காலமெல்லாம் காத்துக்கிடந்தே
கவலை மிகக் கொள்கிறான்

விளைச்சலைப் பெற
முதலில் விதைத்தலும்
வேண்டியதைப் பெற
முதலில் கொடுத்தலும்
காரியம் வெற்றிபெற
முதலில் துவக்குதலும்
அவசியமென்பதை அறியாமலேயே...
துவக்க வேண்டியது
தான்தானென்பது புரியாமலேயே...

எதனையோ எவரையோ எதிர்பார்த்தபடியே
இன்றும்  எப்போதும்போல்
காத்திருந்து காத்திருந்து
வெந்து நொந்துச் சாகிறான்
பாவப்பட்ட அவன்....

Saturday, May 12, 2018

neet is also good as neat

நீரை அடித்துக்கிளப்பி
அச்சுறுத்தும் அலையாக்கி
அலைதான் கடலென
 சாதிக்க முயல்கிறது
சுயநலப் பேய்க்காற்று

 அலைச்சீற்றம் கண்டு
அச்சம் கொண்டு
முத்தெடுக்கப் பயணிப்போரை
முடக்கிவிட முயல்கிறது
முட்டாள்ப் பேய்க்காற்று

கடலின் ஆழம் அறிந்தோர்
 அதன் சீலம் அறிந்தோர்
கிஞ்சிற்றும்
குழப்பம் கொள்ளவில்லை
ஒதுங்கிக் கரையில் நிற்கவில்லை

கடந்ததைத் தாண்டும் விதமாய்
சாதனையெனச் சொல்லும் விதமாய்
 கூடுதலாய் கடலினுள் பயணிக்கின்றனர்

பதினான்குக்கொருவர்
அதுவும் கூடுதல் பிடுங்கலின்றி
முத்தெடுத்தல் சாத்தியம் என்பது
அவர்களுக்குத்தெரியும்

கத்தியின்றி இரத்தமின்றி
சுதந்திரம் பெறுதல் மட்டுமின்றி
அல்லக்கைகளின் அட்டகாசங்களை
ஒழிக்கவும்  முடியும் என்பதற்கு
ஒரு நேரடிச் சாட்சியாய்....

ஆம் இனிநேர இருக்கும்
பெரும் மாறுதலுக்குக் கட்டியம் கூறும் விதமாய்

ஆம் இனி மாளிகைக்காரர்கள் மட்டுமின்றி
இனி மத்தியமரும்
முத்தெடுக்கும்  சாத்தியமென்பதை
நிரூபிக்கும் விதமாய்  

Friday, May 11, 2018

நிர்வாண ஞானம்

 "உனக்குத் தெரியாது
நான் சொல்கிறபடிச் செய் "என்றார் அப்பா

எரிச்சல் எரிச்சலாக வந்தாலும்
என் நன்மைக்குத்தானே எனச்
 சொன்னதை எல்லாம் தவறாது செய்தேன்

 " உனக்குத் தெரியாது
 நாங்கள் சொல்கிறபடிச் செய் "
என்றார்கள் ஆசிரியர்கள்

 கோபம் கொப்பளித்துக்கொண்டு வந்தாலும்
என் வளர்ச்சிக்குத்தானே என
சொன்னதை எல்லாம் தட்டாமல் செய்தேன்

 "உங்களுக்குத் தெரியாது
நான் சொல்கிறபடிச் செய்யுங்கள் "
என்றாள்  மனைவி

அனுபவத்தில் சில விஷயங்களில்
அவள் சொல்வதே சரியாய் இருந்தாலும்
 ஆண் எனும் மனோபாவத்தில்
விரும்பாத பாவனையில் செய்தேன்

"உங்களுக்குப் புரியாது
நான் சொல்கிறபடி மட்டும் செய்யுங்கள் "
என்றான் மகன்

புதிய தொழிற்நுட்பங்கள் புரியாததால்
வேறு வழியின்றி வேண்டா வெறுப்பாய்
அவன் சொன்னதை மட்டும் செய்து கொண்டு வந்தேன்

 "மக்குத்தாத்தா
 உனக்கு ஒன்னுமே தெரியலை
 இப்படிச்செய்யனும் "எனத்
தப்பும் தவறுமாய்  எது ஒன்றையும் செய்கிறாள் மழலை தாண்டும் பேத்தி.

முதன் முதலாய் தவற்றை ஒப்புக்கொண்டு
அவள் போங்கில் சரியாய்ச் செய்து போகிறேன்

 வாழ்வில் முதன் முதலாய்
"உனக்கு எதுவும் தெரியாது "என்கிற வார்த்தைக்குச்

சங்கடப்படாதபடி..
அதிகம் சந்தோசம் கொண்டபடி
அடிக்கடி சொல்லமாட்டாளா என எதிர்பார்த்தபடி


Wednesday, May 9, 2018

வேதாளம் சுமந்த விக்கிரமாதித்தனாய் ...

படைப்பாளிக்கு
இது வரமா இல்லை சாபம்தானா ?

முன்னிரவில் விசையுடன்
அடிமனத்திலேயே
மையம் கொண்ட  "அது "

வளர்ந்து நகராது
அல்லது
கரைந்து மறையாது

விசையுடன் அவனை  இம்சிக்க...

அதன்  போக்கை
கணிக்கத் தக்கவனாய் இராது
கவனிக்காத தக்கவானாய் மட்டுமே
இருக்க முடிவதால் ...

கனத்ததை விழுங்கிய
கருநாகமாய்
மெல்ல மெல்ல ஊர்கிறது
அவனது உறக்கத்தையும்  விழுங்கியபடி
இன்றைய இரவும் ..

துணைக்கு யாருமற்று
தானே பிரசவிக்க நேர்ந்த
ஒரு ஜீவனின் அவஸ்தையுடன்
உலாவத் துவங்குகிறான்
பேயாய் இந்த நடு இரவிலும்...

வேதாளம் சுமந்த விக்கிரமாதித்தனாய்
இது படைப்பாளிகளுக்கேயான
வரமா இல்லை சாபம்தானா எனும்
விடைதரா கேள்வியைச் சுமந்தபடியும் ...


Monday, May 7, 2018

என்னருமைத் தமிழ்த் தாயே...

தெரியாதவருக்குச்
சொல்வதைப் போல
எதையும் விளக்கிச் சொல்லிவிடாது
மிகவும் எச்சரிக்கையாய் ..

தெரிந்தவருக்கு
ஞாபகம்செய்வதைப் போலவே
எதையும் மிகவும் எளிமையாய்
மிகச் சுருக்கமாய்...

பாண்டியத்தைக்
காட்டும்படியாய்
எந்தப் பெரும் வார்த்தையையும்
தவறியும் பயன்படுத்தி விடாது

வசனகவிதைக்கும்
உரை நடைக்கும் இடையினில்
மிகச் சரியாய் புரியும் படியாய்
மிக மிக எளிமையாய்

மிகப் பெரும்பிரச்சனையும்
நாளும் விட்டு விடாது
தொட்டுப் போக முனைகிறேன்
சமூக அக்கறையின் காரணமாய்..

நித்தமும்
கரிக் கங்கினை வெறும் கையால்
இடம் மாற்றும்
அப்பத்தாவின் லாவகமாய்...

"போற்றுவோர்
போற்றாட்டும் புழுதி வாரி
தூற்றுவோர் தூற்றட்டும் "என்ற
மன நிலை மாறாமலே

பிரச்சனைகளை
நடு நிலைக் கண்ணோட்டத்தோடு
நாளும் அணுகுகின்ற
நல்லமனப் பாங்கினையும்
  
வார்த்தையோடு விளையாடும்
சூட்சுமமும் எனைவிட்டு
மாறாதுக்  காத்திடுவாய்
என்னருமைத் தமிழ்த் தாயே

Thursday, May 3, 2018

"வனத்தோடு வாழ்ந்தாலும்...

"வனத்தோடு வாழ்ந்தாலும்
இனத்தோடு வாழ் "

இதில் இனம் என்பது
உடலால் என்பதில்
விலங்குகளுக்குக் குழப்பமில்லை

நமக்குத்தான் ஆயிரம் குழப்பம்

ஆதி மனிதனுக்குக் குழுவே இனம்
அடுத்து அதன் தொடர்ச்சியாய் ஜாதி
அதன் அகண்ட வடிவாய் மொழி
அதன் எல்லை விரிய விரிய மதம்
அது இன்னும் இன்னும் விரிய நாடு

அதன் நிறைவான எல்லையாய்
மதிக்கத் தக்கதாய் மனிதம்

ஆயினும் இன்னும் நம்மை
நிறைவினில் சிறிது நேரம்  கூட நிற்கவிடாது
குறைந்த பட்சம் நாட்டுடன் கூட
நிலைபெற்று இருக்க விடாது

இனம் என்னும் சொல்லுக்கு
வேறு வேறு விளக்கம் அளித்து
நம்மை பின்னோக்கி நகர்த்துவோரை ...

இனியேனும்
நம் எல்லைக் கோட்டைவிட்டு
வெளியே நகர்த்தி வைப்போம்

நம் நிலை என்றும்
நாட்டிற்குக் கீழிறங்கிவிடாது
மேல் நோக்கியே நகரும் எனும்
உறுதியை நெஞ்சில் ஏற்போம்

Wednesday, May 2, 2018

தலைவர்கள் தேவைப்படுகிறார்கள்

தமிழகத்திற்கு இப்போது
மிக மிக அவசரமாய் அவசியமாய்த்
தலைவர்கள் தேவைப்படுகிறார்கள்

படிப்பு , சுய நலமின்மை ,
பொது நலன் பேணல் முதலான
குணங்கள் தேவையில்லை

ஊராட்சி வார்டில் நின்று
ஜெயிக்கும் செல்வாக்கு இல்லையெனிலும்
அது ஒரு பொருட்டில்லை

உணர்வுப் பூர்வமாய்
கேட்போரைக் கவரும்படியாய்
பேசமட்டும் தெரிந்திருக்கவேண்டும்

மிகக் குறிப்பாய்...

ஜாதி வைத்தோ மதம் வைத்தோ
மக்களைக் கூறு போடும் படியாய்...

எங்கோ எந்தக் கருங்காலியோ
செய்யும் சிறு பிரச்சனையாயின்
அதனைப் பெரிதாக்கும் படியாய்

பெரிதெனின் அதனை
பிரச்சனையாகச் சிந்திக்கவிடாது
ஜாதி மதத்தோடுக் கலந்து
இன்னும் மிகப் பெரும் பிரச்சனையாக்கும்படியாய்

அவசியம் பேசத்  தெரிந்திருக்க வேண்டும்

இப்போது
அதைச் செய்து கொண்டிருப்பவர்களின்
போலி அடையாளங்கள் உதிர்ந்து போனதால்

ஒரு பெருவாரியான மதத்தின் பெயரைத் தாங்கிய
வேற்று மதத்தினர் என்பது
அதிகம் பிரச்சாரமாகிப் போனதால்

அவர்களை நம்பி இனிப் பயனில்லை என்பதாலே
நாங்கள்
புதுத் தலைவர்களைத் தேடுகிறோம்

(பொது மதத்தினருக்கு
கூடுதல் வாய்ப்பளிக்கப்படும் என்பதைக்
கருத்தில் கொள்ள வேண்டுகிறோம் )

இவண்

தமிழகத்தை பதட்டத்திலேயே வைத்திருக்க
உறுதி கொண்டோர் கழகம்
(த.ப.வை.உ.கொ.க  )

Tuesday, May 1, 2018

பகைவரை முற்றாய் வெல்லப்போகிறோம் ?

நம் பகைவர்கள் நம்மை வெல்ல
முன்புபோல்
தம் படைப்பலம் பெருக்குவதில்லை
முன்புபோல்
தம் ஒற்றர்களையும் நம்புவதில்லை

மாறாக நம்முள்
நன்கு பேசத் தெரிந்த சிலரைத்
தங்கள் துணையாக்கிக் கொள்கிறார்கள்
அவர்கள் மூலம் நம்மை எப்போதும்
பதட்டத்திலேயே வைத்திருக்கச் செய்கிறார்கள்

பதட்டத்தில் எப்போதும் இருக்கும் நாம்
இயல்பாக நம் சுயம் இழக்கிறோம்
அதன் காரணமாகவே நம்
கடமைகளையும் மறக்கிறோம்

எங்கோ சில கயவர்கள்
செய்யும் அட்டூழிங்களை அவர்கள்
ஜாதிக்குள்ளும் மதத்திற்குளும்  அடக்கி
நம்மை கொந்தளிக்கச் செய்கிறார்கள்

போராட்டப் போதையில் நம்மை
எப்போதும் இருக்கவைத்து
நேர்மறையான பல விஷயங்களை
நம்மை பார்க்காதே செய்துவிடுகிறார்கள்

உடனிருந்து கொல்லும் நோயாய்
நம்முடனிருந்து நம்மை
நாளும் வீழ்த்தும் இவர்களை
என்று அடையாளம் காணப்போகிறோம் ?

நாம், நம் குடும்பம்,நம் நாடு எனும்
நமக்கான விஷயங்களில்
கவனம் கொள்ளப்போகிறோம் ?
பகைவரை முற்றாய் வெல்லப்போகிறோம் ? 

Monday, April 30, 2018

அதிகம் படித்த மூஞ்சூறு கழனிப்பானையிலே...

அனைத்து மதப் பானைகளிலும்
மேற்பரப்பில் மட்டுமே
உண்ணச் சகிக்கா
அதிகம் வெந்த சோறு

பக்குமாய் வெந்து உள்ளிருக்கும்
சோற்றினை அறிந்து கொள்ளமுடியாதபடி...
அதனை  முற்றிலுமாய்  மூடி மறைத்தபடி

மேற்  கவளம் நீக்கினால் போதும்
ஆம் ஒரே ஒரு கவளமெடுத்து
கழனிப்பானையில் எறிந்தால்போதும்

மீதம் உள்ளிருப்பது எல்லாமே
உடலுக்குறுதி சேர்க்கும்
உன்னதச் சோறு தானே

அதிகம் படிந்த முன்சோறு
கழனிப்பானயிலே என்பதனை
அதிகம் படித்த  மூஞ்சூறு கழனிப்பானையிலே
எனத் தவறாய்ப் புரிந்து கொண்டதைப் போல்...

மேற்சோறேபானைச் சோறு என
இன்னும் எத்தனை நாள்
தவறாய்ப் புரிந்து திரியப்  போகிறோம் ?

மதத் தீவீரவாதிகளின் வாதத்தில் மயங்கி
மதத்தின் அருமையை
மறந்து திரியப் போகிறோம் ?

Saturday, April 28, 2018

..தனக்கான காலம் கடந்தும் ..

காலங்கடக்கும்
சக்தியுள்ள கவிதைக்கான
கரு ஒன்று
வளர்ச்சியடைய விரும்பாது
அவனுள்
கருவாகவே சுழன்று கொண்டிருக்கிறது
தனக்கான காலம் கடந்தும்  ..

அவன் படைப்பின் மீதான
சிலரின் விமர்சனம்
ஒருதலைப்பட்சமானதுதான்
என்றாலும்
இவ்வளவு உணர்சிவசப்படுதல் பிடிக்காது

அவனைப் பாராட்டும் பலரின்
பாராட்டுக்கள் எல்லாம்
மிக நியாயமானதுதான்
என்றாலும்
இவ்வளவு பெருமிதம் கொள்வதை விரும்பாது

சம நிலையடையும்
சமயம் வரட்டும் என்று...

கருவாகவே சுழன்றுகொண்டிருக்கிறது
காலம் கடக்கும் சக்தி கொண்ட
வெகு அற்புதமான கரு ஒன்று.
தனக்கான காலம் கடந்தும்  ..
.

Wednesday, April 25, 2018

மட்டுமேயை மட்டும்....

சினிமாவினால் தமிழில்
பிடிக்காத வார்த்தையாய்
பிரபலமாகிப் போன
"மன்னிப்பைக் " கூட
என்னால் மன்னித்து விட முடியுது
ஆனால்
இந்த மட்டுமேயை மட்டும்
மன்னிக்கவே முடியவில்லை  ( சினிமாவினால் )

அதிகப் பட்சவிலை என்பது
அநியாயக் கொள்ளைதான் என்றாலும்
உணமையைச் சொல்லித் தொலைப்பதால்
அதைக் கூட
பொறுத்துத் தொலைக்க முடிகிறது
ஆனால்
இந்த மட்டுமேயை மட்டும்
ஜீரணிக்கவே  முடியவில்லை  (சினிமாவினால் )

ஏதோ மிகக் குறைவான விலையை
மிகக் சரியாய்ச் சொல்வதைப் போல
எம்மை மயக்கிட நினைக்கும்
இந்த "மட்டுமேயை  "
பொருளின் விலைப்பட்டியலில்
கண்டபோதெல்லாம்
எம்மை மயக்க நினைப்பதுபோல்
எம்மை மடையனாக்குவது போல் தெரிவதால்
                                         (சினிமாவினால் )

Thursday, April 19, 2018

தப்புக்கும் தவறுக்கும்...

தப்புக்கும் தவறுக்கும் இருக்கும்
வேறுபாடு புரியாததால் தான்
தப்புக்கான தண்டனையை தவறுக்கும்
தவறுக்கான மன்னிப்பை தப்புக்கும்
தப்புத் தப்பாய்த் தந்து
நாட்டில் தப்புக்களை
தாறுமாறாய் வளரவிட்டுக் கொண்டிருக்கிறோமா ?

நகத்தால் செய்து முடிக்கவேண்டியதை
கோடாலி கொண்டு பெயர்த்துக் கொண்டும்
கோடாலி கொண்டு வெட்டிச் சாய்க்கவேண்டியதை
நகத்தால் கீறிக் கொண்டுமிருக்கிறோமா ?
அதன் காரணமாகவே
நச்சு மரங்கள்இன்னும்
செழித்து வளர உரமிட்டுக் கொண்டிருக்கிறோமா ?

இல்லையெனில்
எங்கோ எவனோ ஒரு கயவன்
செய்து தொலைக்கும் கயமைக்கு
அவனுக்கு எதிராய் ஒன்று திரளாது
கயமைக்கு எதிராய் கொதித் தெழாது
 ஜாதி மதப்  பூச்சுப் பூசி
நாட்டின் இறையாண்மைக்கு
ஊறு விளைவிப்போமா ?

இல்லையெனில்
நம்மை கொதி நிலையிலேயே
அன்றாடம் நிற்க வைத்து
போராட்டக் களத்தில் குதிக்க வைத்து
தன்னை வளர்த்துக் கொள்ள நினைப்போரை
புரிந்துக்கொண்டு விலகாது
தொடர்ந்து மோசம் போவோமா?
தேச ஒற்றுமையைக்கு ஊறு விளைவிப்போமா ?

இனியேனும்
தப்புக்கும் தவறுக்குமான
வேறுபாட்டை மட்டுமல்ல
முழங்காலுக்கும் மொட்டைத்தலைக்கும்
முடிச்சு போட நினைப்போரை
எதனையும் ஜாதி மதத்திற்குள்
துணிந்து நுழைக்க முயல்வோரைக்
கண்டு ஒதுங்கிச் செல்வோமா ?
நாடேபெரிதென மனதில் உறுதி கொள்வோமா ?

Monday, April 16, 2018

கவிதைக் கரு

கனல் புணர
மனம் குளிர்ந்து
ஒளியாய் உருக்கொள்ளும்
பாக்கியமற்று

காற்றின் அணைப்பில்
மனம் வெறுப்புற்று
மெல்ல மெல்லக் கரையும்
கற்பூரமாய்

உணர்வுப் புணர்வில்
மதிமயங்கி
கவியாக உருவாகும்
பாக்கியமற்று

சொற்களின் பிடியில்
சுயமிழந்து
கரையத் துவங்குது
கவிதைக்  கரு

என்றும் போலவே
மாறாது
இன்றும் இப்போதும்

Wednesday, April 11, 2018

கவிதையை நிறைவு செய்யலாமே

போர்க்களமென
இதிகாச காலங்களில்
ஓரிடமிருந்தது
வீரர்கள் மட்டும் தம் வீரம் காட்டும்
ஒரு பெரும் மைதானமாய்...

இன்று போல்
எந்த விதத்திலும் காரணமாகாத
வெகு ஜனங்கள்
வாழும் பகுதியாய் அல்லாமல்

வீரர்களென
மன்னர் காலம் வரை
மனிதர்கள் இருந்தார்கள்
நேருக்கு நேர் நின்று போர்புரிதலே
வீரத்திற்கு இலக்கணமென

இன்றுபோல்
எங்கிருந்தோ நள்ளிரவில்
எவரோ குண்டுமழை
பொழிதல் போலல்லாமல்..

மன்னர்களென
ஒரு குடும்பமே தொடர்ந்து
நாட்டை ஆண்டுவந்தது
மக்களுக்காக வாழ்வதே
தமக்கான பணியென்று குழப்பமில்லாமல்

இன்றுபோல்
தம் குடும்ப நலன் காக்க
தம் குடும்பமே பதவியில் தொடரவேண்டும்
என்னும் சுய நலம் போலல்லாமல்

இவை அனைத்திற்கும் காரணம்...

(அவரவருக்குத் தோன்றும் காரணங்களை
சுருக்கமாய்ப் பதிவு செய்து
கவிதையை நிறைவு செய்யலாமே )

நல்வாழ்த்துக்கள்

      

நமது வலையுலக நண்பர்களுக்கு ஒவ்வொரு ஆண்டும்
கவிதைப்  போட்டிகள் நடத்திப் பரிசுகளும்
சான்றிதழ்களும்வழங்கிப் பெருமைகொண்ட
இலங்கையை  வாழ்விடமாகக்கொண்ட
கவிஞர் ரூபன் அவர்களால் துவங்கப்பட இருக்கும்
மாதாந்திர தமிழ் இலக்கிய இதழ்
தமிழ் இலக்கிய வானில் தங்கத் தாரகையாய்
மிளிர்ந்திட வேண்டும் என
வாழ்த்துவதில் பெரும் மகிழ்ச்சியடைகிறேன்

வாழ்த்துக்களுடன் ....




Thursday, April 5, 2018

அந்த முறையே கவிதை எனநாம் தெளிவோம்

சொல்ல நினைப்பதை
தெளிவாய் அறிவோம்-பின்
தெளிவாய் அறிந்ததைத்
தெளிவாய்ச் சொல்வோம்

சொல்ல நினைப்பதை
உணர்ந்துத் தெளிவோம்-பின்
உணர்ந்துத் தெளிந்ததை
உணரச் சொல்வோம்

சொல்ல நினைப்பதை
முழுதாய் அறிவோம்-பின்
முழுதாய் அறிந்ததை
நிறைவாய்ச் சொல்வோம்

சொல்ல நினைப்பதன்
பயனை அறிவோம்-பின்
பயனதைப் பிறரும்
பயனுறச் சொல்வோம்

சொல்ல நினைப்பதை
முறையாய்ச் சொல்வோம்-அந்த
முறையே கவிதை
எனநாம் தெளிவோம்

Tuesday, February 20, 2018

இந்த அசிங்கத்தை வேறெப்படிச் சொல்வது...?

அந்தக் காலங்களில் நாம் இருவருமே
நல்ல மனிதர்களாய் இருந்தோம்

எம் நல்வாழ்வு  குறித்து
எப்போதும் சிந்தித்தபடி நீங்களும்

உங்கள்  உயர்வு குறித்து
எப்போதும் வேண்டியபடி நாங்களும்

அதனால்
எங்களைச் சந்திப்பதில் உங்களுக்கிருந்த
மகிழ்வும் இன்பமும்
அன்று உண்மையாய் இருந்தது

அதனாலேயே 
உ ங்களைத் தரிசிப்பதில் எங்களுக்கிருந்த
ஆர்வமும் எழுச்சியும்
அளவு கடந்தும் இருந்தது

அதனால்தான் இரவெல்லாம் நாங்கள்
தூங்காது விழித்துக் காத்திருந்தோம்

அதனால்தான் பகலிரவாய் நீங்களும்
சோராது சந்தித்து மகிழ்ந்தீர்கள்

இப்போது நாம் இருவருமே
மோசமான வியாபாரிகளாகி விட்டோம்

உம் நிலைப்புக் குறித்து
எப்போதும் சிந்தித்தபடி  நீங்களும்

எங்கள் அற்பத் தேவைகள் குறித்து
எப்போதும் நினைத்தபடி நாங்களும்

எங்களைச் சந்திப்பது
உங்களுக்கு இப்போது
அலுப்பாகவும் சலிப்பாகவும்

உங்களைச் சந்திப்பது
எங்களுக்கு  இப்போது
வெறுப்பாகவும் கோபமாகவும்

அதனால்தான்
இப்போதெல்லாம் நீங்கள்
அழைத்துச் செல்லவேண்டி
துண்டு விரித்துக் காத்திருக்கிறோம்

மாறிய
சூழலறிந்து நீங்களும்
பணத்துடன் பொட்டலத்துடன்
எம் வீட்டு வாசல் வருகிறீர்கள்

இருவரில் யார் மிக மோசம்
என்னும் போட்டி
நம்முள் தொடர்ந்து கொண்டிருக்கிறது...

மிகச் சரியாகச் சொன்னால்...

விபச்சாரி வீடு போய்
பழக்கப்பட்டவன்
பழக்க தோஷம் போகாது

முதலிரவில் மனைவியிடம்
நூறு ரூபாய்க் கொடுக்க

அவளும் பழக்க தோஷம் போகாது
ஐம்பது ரூபாயைத்
திருப்பிக் கொடுத்த கதையாக...

இந்த அசிங்கத்தை வேறெப்படிச் சொல்வது...?

Friday, February 16, 2018

எனவே இனியேனும்.......

பொதுக்கூட்டங்களில்
விளையாட்டு மைதானங்களில்
பார்வையாளர்களாய் இருக்கும் நாம்
நிச்சயம்
பாராட்டுக்குரியவர்களே

ஏனெனில்
பார்வையாளர்களாய் இருப்பதன் மூலம்
நம்மை மட்டுமல்ல
அந்த நிகழ்வையும்
பொதுக்கூட்டத்தையும்
விளையாட்டையும்
சுவாரஸ்யப்படுத்துவதோடு மட்டுமல்லாது
பங்கேற்றவர்களையும்
கௌரவப்படுத்தியும் போகிறோம்

ஆயினும்
நமக்கான
போராட்டங்களில்
இயக்கங்களில்
நாம் வெறும்பார்வையாளர்கள் எனில்
நிச்சயம்
பரிகாசத்துக்குரியவர்களே

ஏனெனில்
போராட்டக்களத்தில்
நாம் வெறும் பார்வையாளர்களாக இருப்பது
நம்மை மட்டுமல்ல
அந்தப் போராட்டத்தையும்
இயக்கத்தையும்
நீர்த்துப்போகச் செய்வதோடு
போராடுவோரையும்
அவமதித்தும் போகிறோம்

ஏனெனில்
முன்னதன் வெற்றி
அதை நடத்துபவரைச் சாரும்
பின்னதோ
நம்மையும் வந்து சேரும்

உழைப்பின்றி
வந்து சேரும் செல்வம் மட்டுமல்ல
பங்களிப்பின்றி
வந்து சேரும்
நன்மைகள் கூட 
நிச்சயம்
அதன் மதிப்பறியாதே செய்து போகும்

எனவே
இனியேனும்..........

Friday, February 9, 2018

காதலர்கள் வித்தியாசமானவர்கள் காதல் விசித்திரமானது !

காதலர்கள்
வித்தியாசமானவர்கள்
காதல்
விசித்திரமானது

காதலியின் முகங்கான
ஒட்டடை நூல்பிடித்துக் கூட
கொடிய எதிரியின் கோட்டை ஏறும்
அசட்டுத் துணிச்சலும்...

காதலை இழந்தால்.
அனைத்துச் சுகங்களையும் ஒதுக்கி
ஏதுமற்ற ஆண்டியாய்த் திரியும்
மனோ வலிமையும்

காதலர்களையன்றி
வேறு யாருக்கு வரும் ?

வெற்றிக் கொண்டவனை
கூட்டத்தில் ஒருவனாக்கி
சராசரியாக்கி உலவ விடும்
அபூர்வச் சக்தியும்

தோற்றவனை
அமரகாவிய நாயகனாக்கி
காலம் கடந்தும் வாழவைக்கும்
ஈடில்லா சாதுர்யமும்

காதலையன்றி
வேறு எதற்கு வரும் ?

ஆம்
அதனால்தான்
இன்னும்
எத்தனை யுகமாயினும்

காதலர்கள்தான்
வித்தியாசமானவர்களாய்த்
தொடர்ந்துகொண்டிருக்கிறார்கள்

ஆம்
அதனால்தான்
எத்தனை
மாறுதல் நேரினும்

காதல் ஒன்றே
விசித்திரமானதாகத்
தொடர்ந்து கொண்டும் இருக்கிறது

வித்தியாசமானதை
விசித்திரமானதை
நாமும் வாழ்த்தி வைப்போம்

இல்லையேல்
நாமும்
வித்தியாசமானவர்களாகத் தெரிவோம்
விசித்திரமானவர்களாக அறியப்படுவோம்

வாழ்க காதலர்கள்
வாழ்க காதலர்தினம்

Thursday, February 8, 2018

தமிழிசையின் அபஸ்வரம் ( ? )

கத்தியினைக்  கொண்டு
பிறந்த நாள் கேக் வெட்டுவது
ஆங்கிலேயர் கலாச்சாரம்
அது நம்முடையதில்லை

தமிழக கலாச்சாரப்படி
கத்தி குத்துவதற்கு
அரிவாள் வெட்டுவதற்கு

அது தலை ஆயினும்
பிறந்த நாள் கேக் ஆயினும்..

மாறிச் செய்வது
நம் மரபல்ல

சந்தேகம் எனில்
பரம்பரைக் குறித்த நினைப்பிலேயே
நாளும் வாழும்
இயக்குநரைக் கேட்டிருக்கலாம்

இது அறியாது தமிழிசை அவர்கள்
அரிவாள் கொண்டு
பிறந்த நாள் கேக் வெட்டுதலை

அதுவும்
ஒரு முன்னணி ரவுடி வெட்டுவதை
ரவுடிகள் சூழ  வெட்டுதலை

தமிழக சட்டம் ஒழுங்கோடு
பிணைத்துப் பார்ப்பது
நிச்சயம் அபஸ்வரமே

அமைதிப்  பூங்காவான  தமிழகத்தின்
பண்பாட்டுக் காவலர்கள்  ( ? )நாங்கள்
இதை வன்மையாய்க் கண்டிக்கிறோம்

தமிழகத்தின் பெருமைதன்னை தொய்யவிடாது ...

"குற்றம் நிரூபிக்கப்பட்டு
குற்றவாளி என தண்டிக்கப்பட்ட ஒருவரின்
பிறந்த நாளின் போது நீ விடுவிக்கப்படுவாய்"
எனத் தண்டிக்கப்பட்ட குற்றவாளியைப் பார்த்து
 ஒருவன் சில மாதங்களுக்கு முன்னாலோ
சில வருடங்களுக்கு முன்னாலோ
 சொல்லி இருந்தால் ......

சந்தேகமில்லாமல்
 நிச்சயம் அவனைப் பைத்தியம் என்றுதானே
முத்திரைக் குத்தியிருப்போம் /

அப்படிப் பட்ட தேசம்
ஒரு பைத்தியக்காரர்களின் தேசம்
என்றுதானே முடிவு செய்திருப்போம்/

அப்படி அப்போது
முடிவெடுக்கவில்லை என்றால்
 நம்மை அல்லவா எல்லோரும்
 பைத்தியம் என முத்திரைக் குத்தி இருப்பார்கள்/

சரி சரி இப்போதும்
அரசின் இந்த வரலாற்றுச் சிறப்புமிக்க முடிவை
 ஆதரிக்கவில்லை எனில்
நமக்கு பைத்தியங்கள் எனப்  பெயர் பெறவே
 நிச்சயம்சாத்தியம் /

எனவே  வை.கோ சார் வகையறாக்கள்
ஆதரிக்கும் முன்னே
நாம் இதனை ஆதரித்து
புரட்சியாளர்கள் எனப் பெயர் பெறுவோம் வாரீர்.

தமிழகத்தின் பெருமைதன்னை
தொய்யவிடாது தொடர்ந்துக் காப்போம் வாரீர்

Tuesday, February 6, 2018

அதைப் போலவும்....

எண்ணம் மட்டும்
நல்லதாய்க்  கொண்டால்
நிச்சயம் செயலெல்லாம்
சிறப்பானதாகத்தான் இருக்கும்

அது தெரியத்தான் செய்கிறது

செயலில் மட்டும்
கவனமாய்  இருந்தால்
உறவுகள் எல்லாம்
சிறப்பானதாகத்தான் அமையும்

அது புரியத்தான் செய்கிறது

உறவுத் தெரிவு மட்டும்
சரியாக இருந்தால்
இவ்வுலக வாழ்வே
சொர்க்கமாகத்தான் இருக்கும்

அது நிஜமெனத்தான் தெரிகிறது

ஆயினும் என்ன செய்ய...?

ஆள்பவர்களை மட்டும்
மிகச் சரியானவர்களாக
தேர்ந்தெடுத்துவிட்டால்
நாடு நன்றாக இருக்கும்
எனது தெரிந்தும்

நாமும் நலமாகத்தான் இருப்போம்
எனத் தெரிந்தும்...

பணத்திற்கும்
வேறு எதெதற்கோ
ஆசைப்பட்டு அடிமைப்பட்டு
காலம் காலமாய்
பாழ்ப்பட்டுக் கிடக்கிறோமே
அவதிப்பட்டுக் கிடக்கிறோமே

அதைப் போலவும்....

(முழுவதையும்
விளக்கத்தான் வேண்டுமா என்ன  ? )

Friday, February 2, 2018

இழக்கப் பிறக்கும் ஞானம்

இல்லற வானில்
நாற்பதாண்டுக் காலம்
இணைந்து இன்புற்று உடன் பறந்த
தன் துணை வீழ்ந்து பட..

வேரெடுக்கப்பட்ட
செடியாய்
மெல்ல மெல்ல
தன்னை இழந்து கொண்டிருந்தவனுக்கு
எப்படி ஆறுதல் சொல்வதெனத் தெரியாது
கைகளை மட்டும் இறுக்கப்
பற்றிக் கொண்டிருந்தேன்

எக்கணமும் வெடித்துச் சிதறுவான் போல்
இறுக்கிக் கிடந்தான் அவன்

பின் மெல்ல அவனே
பிதற்றத் துவங்கினான்

"இரவு இத்தனை நீண்டதென
இருள் இத்தனைக் கனத்ததென
தனிமை இத்தனை துயெரென
வெறுமை இத்தனைக் கொடிதென
அவளை இழந்தபின் தான்
இந்த ஒரு வாரத்தில்தான்
எனக்குப் புரிந்து தொலைக்கிறது

பசி இருக்க
உண்ண முடியாதும்
உடல் அயற்சியுற்றும்
உறங்க முடியாதும்
உயிர் இருந்தும்
இயங்க முடியாதும்
என்ன கொடுமையிது " என்றான்

கண்ணீருடன் கலங்கி நின்ற
அவன் நிலை காணக் காண
மனம் பற்றியெரியவும் துவங்கியது

"பாவக்கா கறியில்
உப்புக் கொஞ்சம் குறைந்ததற்காக
நேற்று
ருத்ரதாண்டவம் ஆடிய  எனக்கு"

Sunday, January 28, 2018

இறுதிச் சுற்று ........

தேவையின்றி 
அலட்சியமாய்
உரச உரச
உதிர்ந்த
ஒடிந்த
தீக்குச்சிகளின்
அருமையை
உணரச் செய்து
பதட்டமேற்றிப் போகிறது....

அவசியமாய்
மிகக் கவனமாய்
உரச வேண்டிய
நிலையில்
எஞ்சிக்
கடைசியாய்
கையில் உள்ள
ஒரே ஒரு
தீக்குச்சி

மடத்தனம் மீண்டும் தொடர்கிறது...

படுத்திருப்பவன்
அனுபவித்துத் தூங்காது
தன்னைக் கடப்பவனுக்கு
தான் உயிர்த்து இருப்பதை
நிரூபிக்கவேண்டும் என்பதற்காக
காலாட்டிக் கொண்டிருக்கும்
மடத்தனத்திற்கு
எந்த விதத்திலும்
குறைவாகப்படவில்லை...

அனுபவப்பட்டவன்
அனுபவத்தைப் பாடமாக்கி வாழாது
தன்னைச் சூழ்ந்தவருக்கு
தான் அனுபவமானவன் என்பதை
நிரூபிக்கவேண்டும் என்பதற்காக
எழுதிக் கொண்டிருப்பதும் என்பதுவும்..

இது தெளிவாகத் தெரிந்தும்...

காலாட்டுபவன் கொள்ளும்
அற்ப சுகத்தை
அவனுக்கு விட மனமில்லை
என்பதுபோல்
எழுதும் அற்ப சுகத்தை விட
எனக்கும் மனமினமையால்...

மடத்தனம்
மீண்டும் தொடர்கிறது

Thursday, January 18, 2018

அரண்மனையும் கோவிலும்

மன்னர்களின் அரண்மனைகளில்
பெரும்பாலானவை சிதிலமடைந்து இடிந்து
அழிந்து போக

அவர்கள் கட்டிய கோவில்கள் இன்றும்
புதுப் பொலிவுடன் இருக்கக் காரணமே
மன்னர்கள் கோவில்களை மக்களின் சொத்தாக
அவர்களை உணரவைத்ததுதான்

அதைப் போன்றே அரசு மற்றும் ,தொண்டு
நிறுவங்கள் தங்கள் பொறுப்பில் என்னதான்
செய்து கொடுத்தபோதும், அதில் சிறிதேனும்
மக்களின் பங்களிப்பில்லை எனில் நிச்ச்யம்
அது தரிசாகத்தான் போகும்

அதனாலேயே நாங்கள் சார்ந்திருக்கிற
சேவைச் சங்கமான உலக அரிமா சங்கம் மூலம்
எந்தச் சேவையைச் செய்தாலும் உடலுழைப்பாகவே
பொருளாகவோ பணமாகவே எங்கள் பகுதியைச்
சார்ந்தவர்களிடம் சிறிய பங்கேனும் பெறாமல்
எந்தச் சேவையையும் செய்வதில்லை

அந்த வகையில் எங்கள் பகுதியில் பிரதான
சாலை வெறும் காட்டுச் செடிகளாலும்
முட்செடிகளாலும் சூழப்பட்டு கவனிப்பாரற்ற
அனாதைச் சாலைகள் போல இருந்தது

குறைந்த பட்சம் காலையில் நானூறு ஐநூறு
நபர்களுக்கு மேல் காலை மாலை நடைபயிற்சி
மேற்கொள்வார்கள்

இதனை ஒரு மனோரம்மியமான நடைப்பகுதியாக
மாற்றும் நோக்கில் சில பகுதிகளைத் தேர்ந்தெடுத்து
அருகில் இருந்த சில நல்ல உள்ளங்களை அணுகி
சாலையில் பூச்ச்செடிகளை  நட்டுவைத்தோம்
பணம் பெற்றதும், நட்டு வைத்ததும், சிலர்
பாராட்டி வைத்ததும், எங்கள் பகுதியிலும்
செய்யுங்கள் நாங்களும் எங்கள் பங்களிப்பைத்
தருகிறோம் என்பதெல்லாம் எங்களுக்கு
பெரும் மகிழ்ச்சியைச் தரவில்லை

மாறாக சில நாட்கள் கழித்து ஒரு நாள்காலை
நடைப்பயிற்சி மேற்கொள்ளுகையில்
அந்தச் செடிகளை தன்னுடைய செடிகளாக
மதித்து ஒரு பள்ளி மாணவி இரசித்து
நீரூற்றிக் கொண்டிருந்தாள்

நிச்சயமாக இனி இந்தச் செடிகள் குறித்து
நாங்கள் கவலை கொள்ளவேண்டியதில்லை
அது அரண்மனை போலல்லாது நிச்சயம்
கோவில்கள் போல என்றும் பொலிவுடன்
திகழும் என்ப்தைச் சொல்லவும் வேண்டுமோ ?


Wednesday, January 17, 2018

அடுத்து யாரோ ?

முன்பெல்லாம் தன்னைச் சமூகம்
திரும்பிப் பார்க்கும்படிச் செய்ய வேண்டுமெனில்
சமூகம் கவனித்து இரசிக்கும்படியாக 
இதுவரை யாரும் சொல்லிச் செல்லாத ஒன்றை
மிக அழகாக சொல்லிச் செல்வார்கள்

இப்போதெல்லாம் சமூகம் தன்னைக்
கவனிக்க வேண்டுமெனில் ஒரு நல்ல
சங்கீதக் கச்சேரிக்கிடையில் தகரத்தைத்
தட்டுபவன் போல்

சமூகமே எரிச்சலடையும்படியாக
சமூக அமைதியைக் கெடுக்கும்படியாக
ஏதேனும் ஒன்றை வாந்தி எடுத்துப் போகிறார்கள்

முதலில் வைரமுத்து, பின் ராஜா
இப்போது நைனார் நாகேந்திரன்
அடுத்து யாரோ ?

Monday, January 15, 2018

ஞாநி .பாசாங்குகள் அற்ற ஓர் மாமனிதன் ( 2 )

ஏற்கெனவே மதுரையில் திட்டமிட்டிருந்தபடி
உடன் வந்த அனைவரும் தங்குவதற்கான
ஏற்பாடுகளைச் செய்து விட்டு நானும்
முனைவர் மு.ரா அவர்களும் ஞாநி அவர்களைச்
சந்திக்க அவர் வீடு தேடிப் போனோம்

அவர் அப்போது சி,ஐ.டி காலனியில்
இருந்த நினைவிருக்கிறது

அவர் வீட்டிற்குள் நுழைகையிலேயே
வராண்டாவில் அவருடைய தாயார்
எதிர்ப்பட்டார்

கணவனை இழந்த ஆசாரமான பிராமணக்
குடும்பப் பெண்கள் தலைமழித்து காவிஉடை
அணிவது போல் அவர் அணிந்து இருந்தது
எனக்கு ஆச்சரியமாக இருந்தது

இத்தனை முற்போக்கு எண்ணம் கொண்ட
அவர் வீட்டிலேயே அப்படியா என எனக்கு
முதலில் ஆச்சரியமாக இருந்தது

பின் அவரிடம் எங்கள் சூழல் குறித்து
விளக்கி அவரின் குழுவிலோ அல்லது
கூத்துப்பட்டரையிலோ இந்த இக்கட்டான
சூழலை சமாளித்து நடிக்கத் தக்க நல்ல
நடிகைகள் யாரும்  நடித்து கொடுக்கும்படி
இருந்தால் நல்லது என கேட்டுக் கொண்டோம்

சிறிது நேரம் யோசித்தவர் "இன்று மாலைக்குள்
இந்தக் கதாப்பாத்திரத்தை உணர்ந்து நடிக்கத்
தக்கவர் என்றால் அது மிகச் சிரமமான
காரியமே.ஆனாலும் எனக்குத் தெரிய
இந்தச் சவாலை என் துணைவியாரால்
ஏற்றுச் சமாளிக்க் முடியும் "என்றார்

அந்த பதில் எங்களுக்கு கொஞ்சம்
தெம்பளிப்பதாக இருந்தது

"அப்படியானால் கொஞ்சம் கேட்டுச்
சொல்லமுடியுமா ?" என்றோம்

"அவர்களால் நடிக்க முடியும்
என்பதைத்தான் நான் சொல்ல முடியும்
நடிப்பதையும் நடிக்காமல் இருப்பதையும்
அவர்கள்தான் முடிவு செய்ய வேண்டும்
நீங்கள் நேரடியாக அவரிடமே கேளுங்கள் "
என்றார்

அப்போது எனக்கு இந்தப் பதில் மிகவும்
ஆச்சரியமளிப்பதாக இருந்தது

என்னைப் பொருத்தவரை மதுரையை ஒட்டிய
ஜாதிக் கட்டுப்பாடுகள் நிறைந்த ஒரு குக்கிராமத்தில்
ஆசாரமான சூழலில் வளர்ந்த எனக்கு
மனைவிக்கான அனைத்து முடிவுகளையும்
கணவன் எடுப்பதையே கண்டு பழகிவிட்ட எனக்கு
நடிப்பதையும் நடிக்காததையும் அவர்தான்
முடிவெடுக்க வேண்டும் எனச் சொன்னது
கொஞ்சம் ஆச்சரியமான விஷயமாகவே பட்டது

(பின் நாங்கள் கேட்டுக் கொள்ள அவர்
நடித்துத் தருவதாக ஒப்புக் கொண்டு
வசனப்பிரதியை வாங்கிக் கொண்டு மாலையில்
நடந்த கடைசி ஒத்திகையை மட்டும்
கவனித்து,பின் அருமையாக நடித்துக்
கொடுத்தார்

நாடகம் முடிந்து பின் நடந்த கலந்துரையாடலில்
எங்களுக்கு ஏற்பட்ட அசாதரணமான சூழலை
விளக்கி ஒரே ஒரு ஒத்திகையில்
மிகச் சிறப்பாக நடித்துக் கொடுத்த அந்தக்
கதாப்பாத்திரம் எது எனக் கேட்ட போது
பார்வையாளர்கள் யாரும் அவரைக் குறிப்பிட்டுச்
சொல்லாததே அவரின் நடிப்புத் திறமைக்குச் சான்று )

இன்றைய நிலையில் கூட வெளியே
ஒரு புரட்சிக்காரனைப் போல பேசிக் கொண்டும்
நடித்துக் கொண்டும்

வீட்டில் ஒரு ஆணாதிக்க
வாதியாய் வாழ்ந்து கொண்டிருக்கிற சூழலில்

அன்றைய நிலையிலேயே தன் தாய்க்குரிய
நம்பிக்கைகளிலோ, துணைவியாருக்குரிய
சுதந்திரத்திலோ தலையிடாது

தன்னளவில் வெளிப்புறத்தில் தன்னைக்
காட்டிக் கொண்டதைப் போலவே
தனிப்பட்ட வாழ்விலும்

அன்று முதல் தன் கடைசி மூச்சுவரை
ஒரு பாசாங்கற்ற மனிதராகவே வாழ்ந்து
வந்த ஞாநி அவர்களை நினைவு  கூர்வதில்
பெருமிதம் கொள்வதோடு அவர் ஆன்மா
சாந்தியடையவும் பிரார்த்திப்போமாக

Sunday, January 14, 2018

..ஞாநி .பாசாங்குகள் அற்ற ஓர் மாமனிதன்

எண்பதுகளின் துவக்கம்.என் நினைக்கிறேன்
வங்கத்தில் பாதல் ஸ்ர்க்கார் அவர்களிடம் பயிற்சிப்
பெற்றப் பாதிப்பில் சென்னையில் ஞாநி அவர்களின்
சார்பாக பரிக்ஷா நாடகக் குழுவும்,முத்துச்சாமி
அவர்கள் சார்பில் கூத்துப்பட்டரையும் மதுரையில்
முனைவர் மு. இராமசாமி அவர்கள் சார்பாக
நிஜ நாடக இயக்கமும் துவக்கப்பட்டு தமிழகமே
கவனிக்கத் தக்க அளவில் நாடகத் துறையில்
பெரும் புரட்சிகர மாறுதல்களை நிகழ்த்திக் கொண்டிருந்த
காலக்கட்டம்.

அப்போது நானும் நிஜ நாடக இயக்கத்தில் என்னை
பிணைத்துக் கொண்டிருந்த நேரம்

முனைவர் மு.ரா அவர்கள் தயாரிப்பில்
இயக்கத்தில் தெரு நாடகமாக "ஸ்பார்ட்டகஸ்" என்னும்
உணர்வுப் பூர்வமான நாடகத்தை
தமிழகம் முழுவதும் நிகழ்த்திக் கொண்டிருந்தோம்

அந்தச் சூழலில் சென்னை லயோலா கல்லூரியில்
இந்த நாடகத்தை நிகழ்த்தும்படியாக அழைப்பு
வந்திருந்தது

மு.ரா அவர்கள் மதுரை காமராஜர் பல்கலைக்
கழகத்தில் பேராசிரியராக பணியாற்றிக் கொண்டிருந்த
காரணத்தால் என்னைப் போல ஒரு சிலரைத் தவிர
ஏனையோர் அனைவருமே பல்கலைக் கழகத்தில்
பட்டமேற்படிப்பு மாணவராக,ஆராய்ச்சி மாணவராக
இருந்தார்கள்..ஒத்திகை முதலான விஷயங்களுக்கு
அதுவே சாதகமானதாகவும் இருந்தது

அந்த வகையில் இந்த நாடகத்தில் முக்கியமான
பெண் கதாப்பாத்திரத்தை இரண்டு பட்டமேற்படிப்பு
மாணவியர் ஏற்று மிகச் சிறப்பாக
நடித்துக் கொண்டிருந்தார்கள்

அன்று மாலை சென்னை கிளம்ப அனைவரும்
புகைவண்டி நிலையத்தில் கூடிக் கொண்டிருக்கிற
நேரத்தில் முக்கியமான பெண்கதாப்பாத்திரத்தில்
நடிக்கும் மாணவியின் தந்தை "இங்கு
நடிப்பதால் ஒப்புக் கொண்டேன்.சென்னைக்கு
என்றால் எனக்கு அனுப்பச் சம்மதமில்லை"
எனும் ஒரு அணுகுண்டைத் தூக்கிப் போட்டார்
நாங்கள் அதிர்ந்து விட்டோம்

காரணம் இந்த தேட் தியேட்டர் எனும் பாணி
கொண்ட இந்த நாடகத்தில் வசன மொழியை விட
உடல் மொழியும்,அரங்கினை ஆளும் உடலசைவுகளும்
மிக மிக முக்கியமானவை.திடுமென பிற
மேடை நாடகங்களைப் போல வசனங்களை
மனப்பாடம் செய்து நின்று பேசிவிட்டுப் போகும்
பாணிக்கு இது முற்றிலும் மாறுபட்டது
என்பதால் உடனடியாக புதியவர் ஒருவரை
கதாப்பாத்திரத்துக்கு தயார் செய்வது அவ்வளவு
சுலபமானதில்லை

இது விவரம் அந்த மாணவியின் தந்தையிடம்
எப்படி விளக்கிச் சொல்லியும் அவர் ஏற்கிற
மன நிலையில் இல்லை

பாண்டியன் புகைவண்டி புறப்பட
ஒலி எழுப்ப ஆரம்பித்துவிட்டது

ஒன்று இந்த நாடகத்தை இன்னொரு நாளில்
நடத்துவதாக தந்தி கொடுத்துவிட்டு அனைவரும்
வீடு திரும்ப வேண்டும். அல்லது... அல்லது
என்ன செய்வது  எல்லோருக்கும்
ஒரு மாபெரும் குழப்பம்

அப்போதும் எவ்வித அதிர்ச்சியையும்
தன் முக பாவனையில் காட்டிக் கொள்ளாமல்
முனைவர் மு.ரா அவர்கள் "அனைவரும்
புகைவண்டியில் ஏறுங்கள்  எப்படியும்
நாடகம் நடத்துகிறோம் " எனச் சொல்லி
அனைவரையும் வண்டியில் ஏறச் செய்து
விட்டார்.

அனைவரும் மாணவர்கள் என்பதால்
என்ன செய்யப் போகிறோம்,எப்படிச்
செய்யப்போகிறோம் என அறியும்
பதட்டமிருந்தாலும் கேட்க அச்சம்

நான் ஒருவன் மட்டுமே அவர் வயதொத்தவர்
என்பதாலும்,அப்போது இயக்கத்தில் ஒரு
பொறுப்பில் இருந்ததாலும் மெதுவாக
"என்ன செய்யப்போகிறோம்,எப்படிச்
செய்யப் போகிறோம்." என மெதுவாக
பேச்சை ஆரம்பித்தேன்

அவர் வெகு நம்பிக்கையுடன் இப்படிச்
சொன்னார்."ஒரு வழி இருக்கிறது
நாம் இருவரும் நாளை சென்னை சென்றதும்
நேரடியாக ஞாநி அவர்கள் வீட்டுக்குப் போவோம்
நிச்சயம் ஒரு தீர்வு கிடைக்கும் " என்றார்

நிஜமாகவே அங்கு அவரைச் சந்தித்த போது
நாடகத்திற்கு ஒரு தீர்வு மட்டும் இல்லை
நிஜம் வாழ்விலும் எப்படி ஒரு பாசாங்கற்ற
சமரசங்களற்ற ஒரு கலைஞராய் ஒரு
தலை சிறந்த மனிதராய்
ஞாநி  அவர்கள் இருக்கிறார்
என்பதும் எனக்குப் புரிந்தது

(தொடரும் )

Thursday, January 11, 2018

அட நீ வேற....

அவன் :    இப்பத்தான் அண்ணே அமெரிக்கா
                  யுனிவெர்சிடி நண்பன் சொன்னான்

இவன் :    என்னத்தடா சொன்னான் ஏற்கெனவே
                  அங்குள்ளவன் சொன்னான்னு
                  என்னத்தையோ இங்குள்ளவர் சொல்ல
                 பெரிய குழப்பமா இருக்கு
                  இதுல நீ வேற

அவன் :   இல்லன்ணே கடவுள கும்பிடாட்டிலும்
                  பரவாயில்லை கொழுந்தனாரை கும்பிட்டா
                  மழைபெய்யும்னு
                 சொன்னா தப்பு இல்லையா அண்ணே
                அப்ப புருசந்தான் தெய்வம்னு நம்புற நம்ம
                 கலாச்சாரம் பண்பாடு என்ன அண்ணே ஆகிறது

இவன்     அப்படி யார்றா சொல்லி இருக்கா
                  எங்கடா சொல்லி இருக்கா

அவன்:   அதுதான் வள்ளுவரு அந்தப் பாட்டுக் கூட
                தெய்வத்தை கும்பிட்டு ஆகாட்டிக் கூட
                கொழுந்தனாரை கும்பிட்டு எந்திரிச்சா
                மழைபெய்யும்னு
                வரும்னுங்கிறதை அவன் தான் அண்ணே
               படிச்சுக் காண்பிச்சான்.
              நானும் கண்ணால பாத்தேண்ணே

இவன் :   போடா போய்த்த் தொலைடா.
             தேவையில்லாம எனக்கு பிரம்மஹத்தி தோஷம்
             பிடிக்க வைச்சுறாத
             (எனச் சொல்லியபடி மிக வேகமாக இடத்தைக்
             காலி செய்கிறான்)

அவன் :   (பதில் சொல்லத் தெரியாமல் ஓடுவதை
               நினைத்த மனதுக்குள் சிரித்தபடி
              அதுதானே அமெரிக்காரனா கொக்கா
              பதில் சொல்ல முடியாம ஓடுறதைப் பாரு
              என மெல்ல முனங்குகிறான்