நீயும் கூட அசட்டு மாமா தானே

ஆசை நூறு நெஞ்சில் பொங்கி மாமா--என்னை
லூசுக் கணக்கா சுத்த விடுது மாமா-நம்ம
நேசம் உண்மை யென்றி ருந்தா மாமா-உடன்
வந்து என்னைக் காக்க வேணும் மாமா

மல்லு வேட்டிக் கட்டிக் கிட்டு மாமா-கனத்த
மைனர் செயினும் போட்டிக் கிட்டு மாமா-வில்லு
விட்டுப் பாயும் அம்பு போல மாமா-உடன்
வந்து என்னைப் பார்க்க வேணும் மாமா

எட்டு ஊரு கேக்கும் படியா மாமா-நல்ல
கெட்டி மேளம் கொட்டிக் கிட்டு மாமா-சீரு
தட்டு நூறு தூக்கிக் கிட்டு மாமா-நீயும்
சொந்தத் தோடக் கூடி வரணும் மாமா

பாறை போல இறுகிக் கிடந்த என்னை-ஒரு
பார்வை யாலே இளக்கிப் போன மாமா-உன்
பாதைப் பாத்து நோங்கிக் கிடக்கேன் மாமா-உடன்
பரிஸம் போட நாளைப் பாரு மாமா

ருசியாச் சமைச்ச சோறு கூட மாமா-கொஞ்சம்
ஆறிப் போனா ருசியை இழக்கும் மாமா- இது
சரியாப் புரிஞ்சா அசத்தல் மாமா நீயே -இல்லை
நிஜமா நீயும்  அசட்டு மாமா தானே