கவிஞனாய் ஜொலிக்க....

புரிந்ததை புரியாதபடியும்
புரியாததை புரியும்படியும்
அறிந்ததை அறியாதபடியும்
அறியாததை அறிந்தபடியும
உணர்ந்ததை உணராதபடியும்
உணராததை உணர்ந்தபடியும்
சொல்லப் பழகு அது போதும்
நீ ஞானியாகத் தெரியக் கூடும்

இருக்கையில் இல்லாததுபோலும்
இல்லாதபோது இருப்பதுபோலும்
இழக்கையில் கிடைத்ததுபோலும்
கிடைக்கையில் இழந்ததுபோலும்
செல்வந்தரெல்லாம் உறவுபோலும்
உறவெல்லாம் செல்வந்தர்போலும்
நடிக்கப் பழகு அது போதும்
நீ செல்வந்தனாய் நிலைக்கக் கூடும்

இருப்பதை இல்லாததுடனும்
இல்லாததை இருப்பதுடனும்
தெளிவானதை குழப்பத்துடனும்
குழப்பத்தைத் தெளிவுடனும்
எதிர்மறையை  நேர்மறையுடன்
நேர்மறையை எதிர்மறையுடன்
ஒப்பிடப் பழகு அது போதும்
நீ கவிஞனாய் ஜொலிக்கக் கூடும்