நவீன உரைகல்

தலைப்பின்றி

எழுதியவர் பெயருமின்றி

ஒரு கவிதையைக் கொடுத்து

வாசிக்கச் சொன்னார்

எம் பத்திரிக்கை ஆசிரியர்

படித்துப் பார்த்தேன்

எதுவும் புரியவில்லை

"எதுவும் புரிந்ததா ?" என்றார்

"இல்லை " என்றேன்

பின் தலைப்பை மட்டும் சொல்லி

"இப்போது புரிகிறதா ? " என்றார்.

"புரிவது போலவும் இருக்கிறது

புரியாதது போலவும் குழப்புகிறது "

என்றேன்

பின் மெல்லச் சிரித்தபடி

எழுதியவர் பெயரைக் காட்டி

"இப்போதாவது புரிகிறதா ? " என்றார்.

அவர் பிற(ர)பலக் கவிஞராய் இருந்தார்

மீண்டும் "இப்போது..."என்றார் ஆசிரியர்

நானும் இப்போது மெல்லச் சிரித்தபடி

"புரிவதோடு மட்டும் இல்லை

மிகச் சிறந்த கவிதையாகவும்..."என்றேன்