நம்பிக்கை

செடியை கொடியை மரத்தை
தாவரம் எனப்
பொதுமைப் படுத்திப்பார்த்தல் சரியா?

தாய் மண்ணின்
அடி வயிறு கிழித்து வெளியேறல்
ஒன்றுபோலத்தான் ஆயினும்
விதைக்குள் வீரியத்தை இயற்கை
வித்தியாசப்படுத்தியல்லவா வைத்திருக்கிறது ?

வேர்ப்பாதங்களை அழுந்த் ஊன்றி
அடிமரக்கால்களில் உறுதிஏற்றி
வான் நோக்கி நிமிரும் மரத்துக்கு
பற்றுக்கோடுவேண்டியதில்லைதான்.

மரமளவு இல்லையாயினும்
வீசுகிற காற்றுக்கு ஒப்ப ஆடி
தன்னை நிலை நிறுத்திக் கொள்கிற
செடிகளுக்குக் கூட
பிடியது அவசியமில்லைதான்

உறுதியற்ற வேர்க்காலுடன்
மெலுந்து போன உடலுடன்
சிறு ஊதற்காற்றுக்கே
தள்ளாடுகிற கொடியதற்கு
மரமோ மதிலோ
காய்ந்து போன குச்சியோ கூட
பற்றுக் கோடாய்
வேண்டியதாகத்தானே இருக்கிறது ?