"அது"

பேசுகையில் மிகத் தெளிவாகவும்
எழுதுகையில் மட்டும்
குட்டையைக் குழப்பும் நண்பன்
மீண்டும்
ஒரு படைப்பைக் கொடுத்துச் சோதித்தான்
அதன் தலைப்பு "அது"வாக இருந்தது

"அதை இதற்கு முன்பு
பார்த்த ஞாபகம் இல்லை
புதியதாக இருந்தது
புரியாமலும் இருந்தது
அதனால்
புதிராகவும் இருந்தது

எட்ட நின்று
அதனைப்பார்த்தேன்
அதன் சூழல் புரிந்தது

மிக அருகில் நின்று
அதனைப் பார்க்க
சூழலுக்குள்
அதன் நிலை புரிந்தது

அணு சரனையாக
அதனைப் பார்க்க
அதன் சிறப்பு புரிந்தது

வெறுப்புடன்
அதனைப் பார்க்க
அதன் "கருமை"புரிந்தது

முற்றாக அதனைவிடுத்து
வெளியேறிப் பார்க்க
அது இல்லாமலே போனது

அத்னுள் இருந்து
அதன் பார்வையில் பார்க்க
அதுவே எல்லாமாக இருந்தது

இப்போது அது
புதிதாக்வும் இல்லை 
புதிராகவும் இல்லை
புரிந்ததாக மாறி இருந்தது "

எனக்கேதும் புரியவில்லை
சிறுபிள்ளைத்தனமாக அது என்றால்
எது என்றேன்

அவன் சிரித்தபடி
எல்லாமும்தான் என்றான்