பருவம் தாண்டிப் பிறந்த காதல்

பருவம் தாண்டிப் பிறந்தக்  காதல்
பாடாய்ப் படுத்துதடி-வயது
வரம்பை  மீறி  மனதுக் குள்ளே
மோகம்  கூட்டுதடி

பார்க்கும் பொருளில் எல்லாம் இருந்து
பாவனைக் காட்டுதடி-என்னைச்
சேர்த்து அணைத்துச்   சொக்க வைத்துச்
சோதனை பண்ணுதடி

இரவில் எல்லாம் விழிக்க வைத்து
இம்சைப்  பண்ணுதடி -பட்டப்
பகலில் கூடக்  கனவில் லயித்து
கிறங்கச் சொல்லுதடி

கருவைக் கொடுத்து முதலில் என்னை
அருகில் அழைக்குதடி-பின்
உருவம் கொடுக்க அலைய விட்டு
வேதனைக் கூட்டுதடி

உறவுக் கூட்டம் நிறையக் கொடுத்து
உணர்வைக் கூட்டுதடி-அவர்கள்
உணர்வுப் பூர்வப்  பதிலைக் காட்டி
உயிரை உலுக்குதடி

 பதிவு எட்டு நூறினைத தாண்டியும்
 ஆர்வம் குறையலையே -நான்கு
நூறுப்  பதிவர் தொடர்ந்த  பின்னும்
தாகம் குறையலையே

பதிவுப் பெண்ணே உந்தன் மோகம்
அட்சய பாத்திரமே-அதற்கு
அடிமை ஆனோர் மீண்டு எழுந்திட
இல்லை சாத்தியமே