"உண்மைக்கும் கவிதைக்கும்.....

"உண்மைக்கும்
கவிதைக்கும்
அதிகத் தூரமோ ?

இல்லையெனில்
ஏன் கவிஞனை
பொய்யன் என்கிறார்கள் ? "
என்றாள் அவள்

"இல்லை இல்லை
தன் கூற்றுக்குக்
கொஞ்சம் அழுத்தம் கொடுக்க
சில வார்த்தைகளைச் சேர்ப்பான் அவன்

அது அவனைப்  பொய்யனாக்கி விடுகிறது
மற்றபடிக்  கவிஞர்கள் எல்லாம்
அரிச்சந்திரன் உறவுதான் " என்கிறேன்

கொஞ்சம் யோசிக்கும்
பாவனையில் இருந்த அவள்
"மிகச் சரியாகப் புரியவில்லை " என்றாள்

நான் சிரித்தபடிச் சொன்னேன்

"தங்களின்  இந்த வாக்கியமே
அற்புதக் கவிதைதான்
நீங்கள் சிறந்த கவிஞர்தான் "

"புரியவில்லை " என்றாள்

"புரியவில்லை  என்பது உண்மை
மிகச் சரியாக என்றது கவித்துவம்" என்றேன்

"புரிந்தது " என்றாள் நாணயமாக