சித்திரை மகளே வாராய்

நற்குண மாந்தர் இந்த
மாநிலம் எங்கும் ஓங்கி
நற்செயல் பெருகி இந்தப்
பூமியே சொர்க்கம் ஆகும்
அற்புதம் நிகழ்த்த வந்த
அதிசய ஆண்டே வாராய்
துர்முக ஆண்டே வாராய்
தீந்தமிழ் ஆண்டே வாராய்

இத்தரை வாழும்  யாரும்
இனிவரும் காலம் யாவும்
எச்சிறு குறையு மின்றி
இனிதென வாழ வென்றே
புத்தொளிப் பரவும் காலை
பிறந்திடும் எழிலே வாராய்
சித்திரை மகளே வாராய்
செந்தமிழ் அழகே வாராய்

மனமது நிறைவு கொள்ள
வாழ்வதும் நிறைவு கொள்ளும்
மனமதில் இந்த உண்மை
நிலைத்திட வேண்டும் என்றே
ஜனகரின் மைந்தன் தந்த
மகிழ்வுறு நாளே வாராய்
புனர்வசு நாளே வாராய்
பைந்தமிழ் நாளே வாராய்

இட்டமாய்ச் செய்யும் எல்லாம்
இனிமையே நல்கும் என்று
திட்டமாய் சொல்லி மாந்தர்
தெளிந்திட வென்றே  கீதைத்
தந்தவன் தன்னை ஈந்த
திருமிகுத்  திதியே  வாராய்
அட்டமித் திதியே வாராய்
அருந்தமிழ்த் திதியே வாராய்

( துர்முக ஆண்டு, சித்திரை மாதம், புனர்பூஷ
நட்சத்திரத்தில்,அஸ்டமி திதியில் பிறக்கிறது
ஞாபகம் வைத்துக் கொள்ள அவசியப்படுவோர்
நினைவில் வைத்துக் கொள்வதற்காக )

தொடர் பயணம்

சமதளமாய்
காலடியில் கிடக்கிறது
எட்டிவிட்ட சிகரம்

ஒரு அடையாளமாய்
சேர்ந்தே இருக்கிறது
அடைந்துவிட்ட இலக்கும்

சிகரத்தை அடைவது
ஓய்ந்துச் சாய இல்லை

கொஞ்சம் ஓய்வெடுத்து
மீண்டும் துவங்கவே என்பதில்
தெளிவாய் இருக்கிறேன்

வெகு கவனமாய்
சிகரத்தில்  கிடைத்த
கிரீடங்களையும் மாலைகளையும்
உடலிலிருந்தும் மனத்திலிருந்தும்
இறக்கி வைத்து
என்னை எளிதாக்கிக் கொள்கிறேன்

ஏனெனில்
ககமான பயணத்தை
சீரழிக்கும் முதல் எதிரி
 கூடுதல் சுமைகளே என்பதில்
எனக்கு எள்ளளவும் சந்தேகமில்லை

தேடலும் பயணிப்பதுமே
வாழ்க்கையேயன்றி

ஒன்றை அடைதலும் இல்லை
ஒன்றில் அடைதலும் இல்லை

இதில்  எனக்கு எவ்வித குழப்பமுமில்லை

மீண்டும் பயணிக்கத் துவங்குகிறேன்

எதிரே சவாலாய்த தெரிகிறது
வானை  முட்டி நிற்கும் 
அந்த நெடிய சிகரம்

(அனைவருக்கும் இனிய புத்தாண்டு
நல்வாழ்த்துக்கள்  )

புத்தாண்டு முதல் சுகவாழ்வு காண்போம்

சக்தி இருந்தும்
சமாதானமாய்

வசதி இருந்தும்
எளிமையாய்

அதிகாரமிருந்தும்
பணிவாய்

அறிவிருந்தும்
அடக்கமாய்

நியாயமிருந்தும்
பொறுமையாய்

பாண்டித்தியமிருந்தும்
மிக இயல்பாய்

மொத்தத்தில் ....

சந்தோஷத்தில்
துள்ளாது

சஞ்சலத்தில்
துவளாது

இருப்பவன்
அகராதியில்

என்றும்

வெற்றியன்றி
தோல்வியில்லை

சுகமன்றி
சங்கடங்களில்லை

இயற்கையின்
என்றும் மாறா

நியதி  இதனை

மனதில் தெளிவாய்
மறையாய்க் கொள்வோம்

புத்தாண்டு முதல்

வாழ் நாளெல்லாம்
சுகவாழ்வு கொள்வோம்

ஒளியேற்றி இருள் நீக்கி மென்மேலும் உயர்வோம்

செய்யக் கூடாதை செய்து
பாழ்படுத்தியவர்களை விட
செய்யவேண்டியதை செய்யாது விட்டவர்களே
உலகை அதிகம் பாழ்படுத்தியிருக்கிறார்கள்

பேசக் கூடாத தைப்
பேசியவர்களை விட
பேசவேண்டியதை பேசாது விட்டவர்களே
உறவுகளை அதிகம் இழந்திருக்கிறார்கள்

படிக்கக் கூடாததை
படித்துக் கெட்டவர்களைவிட
படிக்கவேண்டியதை படிக்காதுவிட்டவர்களே
முன்னேற்றதை அதிகம் தொலைத்திருக்கிறார்கள்

எழுதக் கூடாததை
எழுதிக் கெடுத்தவர்களை விட
எழுத வேண்டியதை எழுதாது விட்டவர்களே
சமூகத்தை அதிகம் கெடுத்திருக்கிறார்கள்

எதிர்மறைச் சிந்தனைகளால்
நேர்ந்த  தீமைகளைவிட
நேர்மறைச் சிந்தனையின்மையால்
நேர்ந்த  அழிவுகளே உலகில் அதிகம்

இருள் போக ஒளி காத்திருப்பதில்லை
ஒளி வந்த இடத்து இருள் வாழ்வதுமில்லை
 தெளிவாய்ப் இப்புத்தாண்டில் இதை நாம்  உணர்வோம்
ஒளியேற்றி இருள் நீக்கி  மென்மேலும் உயர்வோம்